Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 273 Hüküm no: 215 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanağa mahallesindeki vakıf hamamın el-Hac Hüseyin’e kiralandığı Mütevellî-i mezbûr meclis-i şer‘de bâ‘isü’l-kitâb el-Hâc Hüseyin b. Hasan nâm kimesne mahzarında ikrâr edip evkāf-ı mezbûremi mahmiye-i merkūmede Soğan Ağa mahallesinde vâki‘ ferd hamâm bundan akdem bir senede dört bin akçeye Mehmed Bey b. ( ) nâm kimesneye îcâr olunmuş idi. Hâlâ senesi tamâm olup tekrâr îcârı lâzım geldikde mezbûr el-Hâc Hüseyin meremmât-ı cüz’iyyesiyle üslûb-ı sâbık üzere istîcâra tâlib olup ben dahi hamâm-ı mezbûru târîh-i kitâbda duhûl eden Cumâdelâhire gurresinden her senesi dörder bin akçeye olmak üzere cem‘an sekiz bin akçeye iki sene tamâmına varınca tevliyetim hasebi ile îcâr eyledim dedikde gıbbe’t-tasdîk mâ-vaka‘a isre’t-taleb sebt olundu. Fî-evâhiri Cumâdelûlâ min-şühûri sene seb‘a ve ışrîn ve elf. Şühûdü’l-hâl: Ali Çelebi b. ( ) el-bevvâ[b], Ali Çelebi b. Sinan el-bevvâb, Ali Çelebi b. Halil el-mi‘mâr, Hüseyin Çelebi b. Ömer ve gayruhüm.