Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 281 Hüküm no: 224 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koğacı Dede mahallesinden Ayşe Hatun bt. Cemaleddin’in bahçeli evinin vakfiyesi Elhamdülillâhi ve’s-salâtü alâ-nebiyyihî Muhammedin ve âlihî ecma‘în ve ba‘dehu mahmiye-i İstanbul’da Koğacı Dede mahallesi sâkinelerinden işbu vakfiyye-i sahîha-i şer‘iyyenin sâhibesi ve hayrât ve hasenâtın râgıbesi fahrü’l-muhadderât Âişe Hatun bt. Cemaleddin tarafından vakf-ı âti’l-beyâna li-ecli’t-tescîl ikrâra ve da‘vâ-yı rücû‘a vekîl olup fahrü’l-akrân Helvacı el-Hâc Murad b. ( ) ve çırağı ( ) nâm kimesneler şehâdetleri ile şer‘an vekâleti sâbite olan fahrü’l-akrân Veli Bey b. Abdülmennan nâm bevvâb-ı sultânî meclis-i şer‘de beyânı âtiye ta‘lîk olunan vakfa li-ecli’t-tescîl mütevellî nasb ve ta‘yîn ettiği Ali b. Halil nâm mimâr-ı hâss mahzarında bi’l-vekâle ikrâr-ı tâm ve takrîr-i kelâm edip mahalle-i merkūmede vâki‘ bir tarafı Mehmed Bey b. Abdullah mülkü ve bir tarafı Emine Hatun bt. Ahmed mülkü ve bir tarafı Medîne-i Münevvere Vakfı ve bir tarafı tarîk-i âm ile mahdûd olup bir bâb tahtânî ve üç bâb fevkānî odayı bir matbahı ve fırını ve bir küçük odayı ve bir bi’r-i mâyı ve kenîfi ve eşcâr-ı müsmire ve gayr-i müsmire ile bir bahçeyi müştemil ilâ-hîni sudûrı hâze’l-vakt taht-ı tasarrufunda mülk-i müşterâsı olan menzilini müvekkilem merkūme Âişe Hatun hasbeten lillâhi te‘âlâ vakf ve habs edip süknâsını evvelen kendi nefsine ba‘dehâ müştemilâtından ıstabl ile taşrada vâki‘ bir bâb odanın süknâsını mu‘takalarından Yasemin bt. Abdullah ve içeride vâki‘ fevkānî büyük odanın süknâsını müdebbiresi Pâyidâr bt. Abdullah’a ve zikr olunan büyük odanın altında vâki‘ oda ile matbah-ı mezbûru mu‘takaları Mihriban bt. Abdullah ve Mülayim bt. Abdullah’a ve bunların evlâdlarına ve evlâd-ı evlâdlarına ve evlâd-ı evlâd-ı evlâdlarına ile’l-inkırâz ve ba‘de’l-inkırâz mecmû‘-ı menzil-i merkūm ecr-i misli ile îcâr olunup her sene hâsıl olan icâresi Medîne-i Münevvere fukarâsına irsâl oluna deyu şart ve ta‘yîn ettikden sonra menzil-i merkūmu mütevellî-i merkūma teslîm ol dahi kabz ve tesellüm edip sâir mütevellîler gibi tasarruf eyledi dedikde vekîl-i merkūmu ikrâr-ı meşrûhunda mütevellî-i merkūm vicâhen tasdîk ve şifâhen tahkīk ettikden sonra ba‘de’l-münâza‘a hâkim-i muvakkı‘ü’l-kitâb İmâmeyn-i hümâmeyn mezheb-i şerîfleri üzere hükmedip min-ba‘d vakf-ı mezbûr vakf-ı lâzım olup tebdîl ve tağyîri adîmü’l-ihtimâl oldu “Fe-men‘ beddelehû ba‘de mâ-semi‘ahu” ilh. Cerâ zâlike ve hurrire fî-evâili Saferi’l-hayr li-sene semân ve ışrîn ve elf el-hicriyye. Şühûdü’l-hâl: eş-Şeyh Mustafa b. ( ), Veli Efendi b. ( ) el-makām, Mehmed Bey b. ( ), Mustafa Çelebi b. ( ), Ali Çelebi b. ( ) ve gayruhüm.