Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 290 Hüküm no: 233 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa Kulaksız mahallesindeki vakıf evin Hüseyin b. Hızır’a kiralandığı Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Veli Bey b. Abdullah nâm bevvâb-ı sultânî meclis-i şer‘-i şerîfde işbu hâmilü’l-kitâb Hüseyin b. Hızır nâm kimesne mahzarında ikrâr u i‘tirâf edip evkāf-ı mezbûreden olup mahrûse-i Galata’ya tâbi‘ kasaba-i Kasımpaşa’da Kulaksız mahallesinde vâki‘ bir tarafdan Muslu Reis mülkü bir tarafdan Süleyman b. ( ) mülkü ile bir tarafdan el-Hâcce Hatun bt. ( ) mülkü ile bir tarafdan tarîk-i âm ile mahdûd olup tahtânî bir evi bir tahta odayı ve müşterek su kuyusunu müştemil olan menzil cümle tevâbi‘i ile târîh-i kitâbdan her ayda yirmi akçe icâre-i müeccele ve bin akçe icâre-i mu‘accele ile mezbûr Hüseyin’e tevliyetim hasebi ile îcâr edip ol dahi istîcâr ve kabûl eyledikden sonra icâre-i mu‘accelesi olan meblağ-ı mezbûr bin akçeyi mezbûr Hüseyin yedinden vakıf için alıp kabz eyledim dedikde mütevellî-i mezbûrun ber-vech-i meşrûh cârî olan ikrârını müste’cir-i mezbûr dahi vicâhen tasdîk ve şifâhen tahkīk ettikde mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn min-şühûri ( ) sene semân ve ışrîn ve elf. Şühûdü’l-hâl: Mehmed Çelebi b. ( ), Ali Çelebi b. ( ), Abdullah b. ( ) er-râcil, Muslu Çelebi b. Kasım ve gayruhüm.