Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 292 Hüküm no: 236 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çatladıkapı’da Ahmed Bey vakfı Terzibaşı evinin Ömer Ağa’ya mütevellisi tarafından kiralandığı Dârü’s-saltanati’l-aliyyeti Kostantıniyyetü’l-mahmiye’de Haremeyn-i Muhteremeyn Evkāfı’na bi’l-fi‘il mütevellî olan fahrü’l-akrân Veli Bey b. Abdülmennan nâm bevvâb-ı sultânî meclis-i şer‘-i hatîr-i lâzımü’t-tevkīrde işbu sâhibü’l-kitâb kıdvetü’l-emâcid ve’l-ekârim sâbıkâ …? ağası olan Ömer Ağa b. Abdüddâim mahzarında bi’t-tevliye ikrâr-ı tâm ve takrîr-i kelâm edip mahmiye-i merkūmede olan ebvâbından Çatladıkapı dâhilinde Nakışbend mahallesinde vâki‘ tûlen ve arzen be-hesâb-ı şatrancî üzere bin dört yüz doksan dokuz zirâ‘ arsa üzere mebnî Derzibaşı evi demekle ma‘rûf dâhiliyye ve hâriciyye muhavvateyni muhtevî olup muhavvata-i dâhiliyyesi iki bâb tahtânî odaları ve önünde sofa ve dahlîzi ve cüneyneyi ve bi’r-i mâyı ve köşk ve şâdırvânı ve zîr zemînli ve iki bâb fevkānî odaları ve iki karanlık odalarını ve iki sofalı ve << bir tahtânî>> üç küçük odayı ve bir matbah ve bir hamâm ve bir fırın ve hazîne-i mâyı ve muhavvata ve hâriciyyesi ahır ve fevkinde iki bâb odayı ve bir sofayı ve tahtında bir oda ve önünde bir köhne havz-ı mâ ve şâdırvân ve bi’r-i mâyı ve fevkinde lede’l-bâbi’l-kebîr bir bâb küçük odayı ve orta kapı kurbünde bir sofayı müştemil olup etrâf-ı erba‘ası kapıcı İsa Bey b. ( ) mülkü ve Serrâc Mustafa Çelebi mülkü ve mahalle-i merkūme imâmına meşrûta menzil ve tarîk-i âm ve vakf-ı mezbûr ve Behram Ağa ve Esma Fâtıma mülkleriyle mahdûd olan menzil bundan akdem vefât eden merhûm Ahmed Bey hâl-i hayâtında ve kemâl-i sıhhatinde vakf-ı sahîh ile vakfedip süknâsını evvelâ kendi nefsine ba‘dehû evlâdına ve evlâd-ı evlâdına ve evlâd-ı evlâdına ile’l-inkırâz ve ba‘de’l-inkırâz ecr-i misli ile îcâr olunup her sene hâsıl olan ücreti Medîne-i Münevvere fukarâsına irsâl oluna deyu şart ve ta‘yîn edip hâlâ ber-mûceb-i şart-ı vâkıf-ı mezbûr menzil-i mezbûr merkūm fukarâ-i mezbûrîne âid olmağla îcârı lâzım geldikde ba‘de’l-müzâyede müşârun ileyh Ömer Ağa yüz bin akçe icâre-i mu‘accele ve yevmî sekiz akçe icâre-i müeccele ve meremmât-ı lâzıme ve ebniye-i cedîdesine kendi mâlından sarf ettiği meblağ izn-i şer‘ ve ma‘rifet-i mütevellî-i vakf-ı mezbûr ile cânib-i evkāf-ı mezbûreden icâre-i mu‘accelesine mahsûb olmak üzere istîcâra tâlib oldukda ziyâde ile tâlib-i âhar zuhûr etmemeğin ben dahi menzil-i merkūmu merkūm Ömer Ağa[ya] vech-i muharrer üzere îcâr ve teslîm eyledim ol dahi istîcâr ettikden sonra meblağ-ı mezbûr yüz bin akçe mu‘accelesini yedinden vakıf için alıp kabz eyledim. Min-ba‘d keyfemâ-yeşâ emsâli gibi mutasarrıf olsun dedikde gıbbe’t-tasdîk mâ-vaka‘a isre’t-taleb sebt olundu. Fî-gurreti Cumâdelâhire min-şühûri sene semân ve ışrîn ve elf. Şühûdü’l-hâl: eş-Şeyh Ahmed el-imâm, Ahmed Çelebi b. Yusuf el-müezzin, el-Hâc Yusuf b. ( ), Mehmed Bey b. ( ), Rıdvan Ağa, Mustafa Bey b. ( ), Mehmed b. Çelebi, Ali b. ( ), Süleyman b. ( ), Behram Kethüdâ, Ali Çelebi b. Ahmed ...? ve gayruhüm.