Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 293 Hüküm no: 237 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İshak Paşa mahallesinde bulunan vakıf evin kirasının tespiti Haremeyn-i Muhteremeyn Evkāfı’ndan olup mahmiye-i İstanbul’da İshak Paşa mahallesinde vâki‘ lede’l-cîrân ma‘lûmü’l-hudûd olan menzilin yevmî sekiz akçe icâre-i müeccele ve mu‘accele ile mutasarrıfı olan işbu hâfızu’l-kitâb fahrü’l-müderrisîni’l-kerîm İdris Efendi b. ( ) meclis-i şer‘-i şerîf-i lâzımü’t-teşrîfe gelip takrîr-i kelâm ta‘bîr-i bâhirü’l-merâm edip menzil-i merkūmun icâre-i müeccelesi ecr-i mislinden ziyâdedir. Kıbel-i şer‘den üzerine varılıp ecr-i misli keşf olunup icâresi tenzîl olunmak matlûbumdur dedikde savb-ı şer‘den bu fakīr ve hâssa mi‘mârlardan Üstâd Ali b. Halil ve zeyl-i kitâbda isimleri mastûr olan bî-garaz Müslimîn ile menzil-i mezbûrun üzerine varılıp <> bi’l-fi‘il vakf-ı mezbûr mütevellîsi olan fahrü’l-akrân Veli Bey b. Abdülmennan nâm bevvâb-ı sultânî mahzarında keşf ve müşâhede olundukda fi’l-vâki‘ menzil-i mezbûrun icâre-i müeccelesi ecr-i mislinden ziyâdedir yevmî dörder akçe ecr-i mislidir deyu mi‘mâr-ı mezbûr ve sâir ehl-i vukūf-ı Müslimîn ittifâk eylediklerinde mâ-hüve’l-vâkı‘ bi’t-taleb sebt olundu. Tahrîren fî-evâili Şa‘bâni’l-mu‘azzam li-sene semân ve ışrîn ve elf. Şühûdü’l-hâl: Fahrü’l-müderrisîn Mustafa Efendi b. Hasan Efendi, Abdullah Beşe b. İbrahim er-râcil, Şaban b. Abdullah ve gayruhüm.