Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 299 Hüküm no: 245 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Birgi mukataasının mütevellisi olan Süleyman Bey’in şâhî denilen paranın değer kaybetmesinden dolayı vakfa kesr geldiğini beyanı Mahmiye-i İstanbul’da Haremeyn-i Şerîfeyn Evkāfı’ndan olup vilâyet-i Anadolu’da kasaba-i Birgi ve tevâbi‘-i mukāta‘asının mütevellîsi olan işbu sâhibü’l-kitâb fahrü’l-akrân Süleyman Bey b. Hüsrev nâm kimesne meclis-i şer‘-i şerîf-i garrâya gelip takrîr-i kelâm edip bundan akdem şâhî dörder akçeye râyic iken mukāta‘a-i mezbûre mahsûlünden dörder akçeye alınmış on bin şâhî yedimde mevcûd bulunup hâlâ emr-i <> sultânî ile her şâhî üçer akçeye râyic olmağla vakfa on bin akçe kesr lâzım gelmişdir. Vâki‘ hâl tahrîr olunmasını taleb ederim deyu ayniyle on bin şâhîyi mütevellî-i merkūm Süleyman Bey meclis-i şer‘-i şerîfe gelip add olunmağın bu vesîka isre’t-taleb sebt olundu yedine def‘ olundu. Hurrire fî-evâhiri şehri Cumâdelûlâ li-sene tis‘a ve ışrîn ve elf. Şühûdü’l-hâl: Hasan Çelebi b. Hüseyin Mi‘mâr-ı hâssa, Veli Bey b. Abdullah el-bevvâbü’s-sultânî, Muslu Çelebi b. el-Hâc Kasım, Ali Çelebi b. Halil Mimâr-ı hâssa ve gayruhüm.