Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 306 Hüküm no: 255 Orijinal metin no: [80a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Dimitri Ramondi’nin Haremeyn-i Şerifeyn Vakfı’ndan istiğlâl yoluyla ödünç aldığı Mahmiye-i Kostantıniyye’de Balat kurbünde vâki‘ Tahta Minâre mahallesinde sâkin olan Kostantin v. Dimitri Ramondi nâm zimmî meclis-i şer‘-i şerîfe gelip işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, bir tarafından Manol v. Kostantin mülkü, bir tarafından Yani v. İlay mülkü ve bir tarafından tarîk-ı âm ile mahdûd cemî‘ menzilini ve hudûdu bir tarafından Bostancıbaşı Ferhad Ağa b. Abdülmennan mülkü, bir tarafından Aleksandıra v. Selvira mülkü, bir tarafından tarîk-ı âm ve bir tarafından tarîk-ı hâs ile mahdûd bulunan iki bahçesini cümle tevâbi‘i ve levâhıkıyla râyicü’l-vakt elli bin akçe-i Osmanî semen-i mu‘ayyen-i makbûzla Haremeyn-i şerîfeyn vakfı mütevellîsi hâfızü’l-kitâb fahrü’l-akrân Bevvâb-ı sultânî Mustafa Bey b. Kurd’a bey‘ ettiğini ikrâr ve i‘tirâf eyledi. O dahî vakıf malıyla ve istiğlâl maksadıyla menzil-i mezbûru iştirâ eyledi. Mütevellî-i mezkûr menzil-i mesfûru ve hadîkateyn-i mezkûreteyni zeyildeki tarihden bir sene tamâmına beş bin akçeye bâyi‘-i mezbûra icâreye verdi. Vâki‘ ikrâr mütevellî-i mezbûr tarafından vicâhen ve şifâhen tasdîk edildi. Menzil-i mezbûrun derkine ve ücret-i kirâya mahmiye-i mezbûre mahallâtından Sultân Bayezid Han mahallesi sükkânından bâyi‘-i mezbûrun amcası Mihayil v. Anton nâm zimmî îcâb ve kabûlü hâvî kefâletle kefîl oldu. Cerâ zâlike ve hurrire fî-evâhiri Recebi’l-mürecceb min-şühûri sene semâne ve ışrîn ve elf. Şühûdü’l-hâl: Mustafa Çelebi b. el-müderris, Abdullah Beşe b. er-râcil, Ali Çelebi b. Halil el-mi‘mâr