Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 307 Hüküm no: 256 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Dimitri Ramondi’nin istiğlal yoluyla Haremeyn Vakfı’ndan aldığı iki bahçeden borcu olduğu Haremeyn-i Şerîfeyn Vakfı’na bi’l-fi‘il mütevellî olan mezbûr Mustafa Bey meclis-i şer‘de mahalle-i merkūme sâkinlerinden Kostantin v. Dimitri Ramondi nâm zimmî mahzarında ikrâr ve takrîr-i kelâm edip bundan akdem mezbûr Kostantin mahalle-i mezbûrede vâki‘ lede’l-ahâlî ma‘lûmü’l-hudûd olan mülk menzilini ve yine menzil-i mezbûr mukābelesinde lede’l-cîrân ma‘lûmü’l-hudûd olan iki hadîkayı yüz bin fıddî Osmânî akçeye bana bi-tarîki’l istiğlâl bey‘ edip ben dahi evkāf-ı mezbûre mâlıyla vech-i mezkûr üzere iştirâ ve tesellüm eyledikden sonra meblağ-ı mezbûr yüz bin akçeyi mezbûr Kostantin yedinden bi’t-tamâm alıp kabz eylemişidim. Hâlâ meblağ-ı mezbûrun elli bin akçesini yine bana edâ ve teslîm etmeğin ancak zimmetinde elli bin akçe bâkī kaldı dedikde mütevellî-i mezbûrun ber-vech-i meşrûh cârî olan ikrârını mezbûr Kostantin bi’l-müvâcehe tasdîk edip fi’l-vâki‘ elli bin akçe evkāf-ı mezbûre mâlından zimmetimde bâkī deynimdir dedikde mâ-hüve’l-vâkı‘ alâ-bi’t-taleb ketb olundu. Tahrîren fî-evâhiri Recebi’l-mürecceb sene semân ve ışrîn ve elf. Şühûdü’l-hâl: Mütevellî-i merkūm meclis-i şer‘de işbu hâmilü’l-kitâb Kostantin v. Manol nâm zimmî mahzarında ikrâr ve takrîr-i kelâm edip bundan akdem evkāf-ı mezbûre mâlından mezbûr Kostantin zimmetinde benim ma‘an mu‘âmelem ile yüz bin yirmi bin fıddî Osmânî râyic fi’l-vakt akçe olup hâlâ meblağ-ı mezbûrdan on bin akçesini mezbûr Kostantin yedinden vakıf için tevliyetim hasebiyle bi’t-tamâm alıp kabz eyledim yüz bin akçesi zimmeti[n]mde bâkī kaldı dedikde mütevellî-i mezbûrun vech-i meşrûh üzere cârî olan ikrârın mezbûr Kostantin dahi bi’l-müvâcehe tasdîk edip fi’l-hakīka yüz on bin akçe evkāf-ı mezbûre mâlından zimmetimde bâkī deynimdir dedikde mâ-hüve’l-vâkı‘ bi’t-taleb ketb olundu. Tahrîren fî-evâili Recebi’l-mürecceb li-sene semân ve ışrîn ve elf. Şühûdü’l-hâl: es-Sâbıkūn