Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 309 Hüküm no: 258 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Dimitri Ramondi’nin borcu karşılığı evini vakfa rehin ettiği Mahmiye-i İstanbul’da Haremeyn-i Muhteremeyn fukarâsına ağayân-ı Dârüssaâde vakfettiği nükūd-ı mevcûdeye bi’l-fi‘il mütevellî olan Mustafa Bey b. Kurd nâm bevvâb-ı sultânî meclis-i şer‘-i hatîrde Kostantin v. Dimitri Ramondi nâm zimmî muvâcehesinde takrîr-i merâm edip nükūd-ı mevcûde-i mezbûreden mukaddemâ merkūm Kostantin’e yüz bin akçe verip ol dahi kabz ettikden sonra mukābelesinde mahmiye-i merkūmede Tahtaminâre mahallesinde vâki‘ ma‘lûmü’l-hudûd mülk menzilini istiğlâl tarîkiyle bana rehn vaz‘ etmişidi. El-hâletü hâzihî meblağ-ı mezbûrun elli bin akçesini bi’t-tamâm alıp kabz eyledim. Meblağ-ı bâkī elli bin akçe hâlâ zimmetinde vakfa lâzımü’l-edâ deyni olup menzil-i mezbûru elli bin akçe mukābelesinde rehn verilmişdir dedikde gıbbe’t-tasdîki’ş-şer‘î mâ-vaka‘a sebt olundu. Fî-gurreti Recebi’l-ferd li-sene selâsîn ba‘de’l-elf el-hicriyye. Şühûdü’l-hâl: Muslu Çelebi b. ( ) er-râcil, Hasan Efendi b. ( ) er-râcil, Hüseyin Efendi b. ( ) er-râcil, Şaban b. Musa er-râcil, Üstâd Hasan b. Hüseyin el-mi‘mâr ve gayruhüm.