Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 310 Hüküm no: 260 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Ömer Ağa’nın Haremeyn Vakfı’ndan olan mülklerinin mütevellisi tarafından 90 yıllığına İsak v. İlya’ya kiralandığı Mahmiye-i İstanbul’da merhûm Küçük Ömer Ağa Haremeyn-i Muhteremeyn’e vakfeylediği akārâta bi’l-fi‘il mütevellî olan fahrü’l-eşbâh İbrahim Çelebi b. Murad nâm bevvâb-ı sultânî meclis-i şer‘de işbu sâhibü’l-kitâb İsak v. İlya nâm Yahudi muvâcehesinde ikrâr edip evkāf-ı mezbûreden mahmiye-i mezbûrede Çelebioğlu mahallesinde vâki‘ <> bir tarafı Kara Bâli vakfı ve bir tarafı Sofçuzâde mülkü ve tarafeyni tarîk-i âm ile mahdûd olup hâriciyye ve dâhiliyyesinde fevkānî ve tahtânî büyût-ı müte‘addideyi ve hamâm ve kenîf ve dekâkîn ve mahzenleri ve musluk ve fırını müştemil olan menzili cümle tevâbi‘ ve levâhıkıyla beher sene otuz altı bin akçe icâre-i müeccele ve her sene lâzım gelen cüz’î meremmâtını kendi mâlından edip ve senevî mukāta‘a-i mu‘ayyenesini dahi kendi mâlından edâ ve teslîm etmek üzere icâre-i tavîle ile merkūm İsak istîcâra tâlib olup vech-i mezkûr üzere îcâr vakfa enfa‘ olmağın ben dahi tevliyetim hasebi ile zikr olunan menzili târîh-i kitâbdan doksan yıl tamâmına varınca icâre-i tavîleyi tecvîz-i fukahâ kavilleri üzere tecdîd-i akde muhtâc olmaksızın her üç yılda bir akd-i cedîd olup akd-i evvelin akd-i sâninin ibtidâsı olmak üzere ber-vefk-i muharrer beher sene otuz altı bin akçe icâre-i müeccele-i merkūme ile mezbûr İsak Yahudi’ye îcâr eyledim ol dahi minvâl-i mezkûr üzere istîcâr ve kabûl eyledi. Ba‘de’l-yevm ta‘yîn olunan otuz altı bin akçe icâre-i müeccele-i mezbûresini her sene cânib-i vakfa edâ eyleye. Müddet-i merkūme değin hâricden kimesne mâni‘ olmayıp zikr olunan menzili keyfe mâ yeşâ tasarruf eylesin dedikde mütevellî-i merkūmu ikrâr-ı meşrûhunda müste’cir-i mezbûr dahi vicâhen tasdîk edicek mâ-vaka‘a alâ-vukū‘ihi bi’t-taleb sebt olundu. Hurrire fî-evâili şehri ( ) min-şühûri sene tis‘a ve ışrîn ve elf. Şühûdü’l-hâl: Kıdvetü’l-erbâbi’t-tah[rîr] Mehmed Efendi el-muhâsib, fahrü’l-ekârim Mehmed Ağa b. ( ) Kethüdâ-i serdârân-ı sarây-ı atîk, el-Hâc Nasuh b. ( ) el-bevvâb, Mustafa Efendi b. ( ) el-müderris ve gayruhüm.