Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 311 Hüküm no: 261 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harameyn vakfından olup Akçakızanlık’ta harap durumda olan evin Ali Efendi tarafından kiralandığı Bi’l-fi‘il Haremeyn mütevellîsi Veli Bey b. Abdülmennan nâm bevvâb meclis-i şer‘de bâ‘isü’l-kitâb Ali Efendi b. ( ) nâm kādı mahzarında bi’t-tevliye ikrâr ve takrîr-i kelâm edip vakf-ı mezbûrdan vilâyet-i Rumeli’nde Akçakızanlık nâm kasabada vâki‘ bir tarafı Debbâğ Ahmed mutasarrıf olduğu mukāta‘alı arsaya ve bir tarafı vakf âsiyâba muttasıl mer‘âya ve bir tarafı Şabanlı el-Hâc Mustafa mutasarrıf olduğu mukāta‘alı arsaya ve bir tarafı tarîk-i âm ile mahdûd tahmînen on iki dönüm arz-ı hâliyesi olan harâba müşrif bir kulle ve iki bâb tahtânî beyt müddet-i medîd mu‘attal ve hâlî kalıp îcârı min-külli vech vakfa enfa‘ olmağın zikr olunan kuleyi ve iki beyti bi-cümleti’t-tevâbi‘ ve’l-levâhık yevmî birer akçe icâre-i müeccele ve sekiz yüz akçe icâre-i mu‘accele ve lâzım gelen imâret ve meremmeti ve müceddeden binâsı mu‘accelesine mahsûb olmak üzere müşârun-ileyh Ali Efendi’ye târîh-i kitâbdan tevliyetim hasebi ile îcâr ve teslîm eyledim ol dahi vech-i meşrûh üzere istîcâr ve kabûl ettikden sonra icâre-i mu‘accelesi olan meblağ-ı mezbûr sekiz yüz fıddî Osmânî nakd-i râyic fi’l-vakt akçeyi yedinden vakıf için bi’t-tamâm alıp kabz eyledim vech-i meşrûh üzere kulle-i merkūmenin lâzım gelen mevâzi‘i imâret ve meremmet ve müceddeden ihdâs edeceği ebniyesi ve iki bâb beytin dahi imâret ve meremmetine mu‘accelesine mahsûb olmak üzere izin verdim. Ba‘de’l-yevm ta‘yîn olunan yevmî bir akçe icâre-i müeccelisini sâl be-sâl cânib-i vakfa edâ eyleye. Hâricden kimesne mâni‘ olmayıp keyfe mâ yeşâ sâir emsâli gibi mutasarrıf olsun dedikde mütevellî-i merkūmu ikrâr-ı meşrûhunda müste’cir-i merkūm Ali Efendi vicâhen tasdîk etmeğin mâ-vaka‘a kayd olundu. Fî-gurreti Recebi’l-ferd li-sene seb‘a ve ışrîn ve elf. Şühûdü’l-hâl: Ali Bey b. ( ) el-bevvâb, Hasan Çelebi b. ( ) Mehmed Bey b. Gazanfer, Hasan Efendi b. ( ) el-bevvâb, Şaban b. Receb.