Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 318 Hüküm no: 269 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. el-Hac Kâbil’in ev vakfı Mâ-tazammenehu hâze’l-kitâb ve havâhu ve’ştemele aleyhi mantukûhu ve fahvahu min-asli’l-vakf ve şerâiti’l-muharrereti fîhî min-kavâdimihî ila havâfihî sahha indî ve hakemtü bi-sıhhatihî ve lüzûmihî ve ene’l abdü’l-fakīr Mustafa b. Ahmed el-kassâmü’l-askerî bi-medîneti’l Kostantıniyyeti’l-mahmiye -ufiye anhümâ- Elhamdü li-veliyyihî ve’s-salâtü alâ-nebiyyihî Muhammedin ve âlihî ecma‘în. İşbu kitâb-ı sıhhat-nisâbın sâhibesi olup mahmiye-i Kostantıniyye mahallâtından Murad Paşa-yı atîk mahallesinde sâkine olan Sâhibetü’l-hayrât ve’l-hasenât kıdvetü’l-muhadderât Emine Hatun bt. el-Hâc Kâbil tasarrufât-ı şer‘iyyesi câyize ve teberru‘ât-ı mer‘iyyesi nâfize olduğu hâlde meclis-i şer‘-i hatîr-i lâzımü’t-tevkīrde vakf-ı âti’l-beyâna li-ecli’t-tescîl mütevellî nasb eylediği Ahmed Beşe b. Abdullah mahzarında ikrâr-ı sahîh-i şer‘î ve i‘tirâf sarîh-i mer‘î kılıp mahalle-i mezbûrede vâki‘ hudûdunun bir tarafı Saraylı Zamâne Hatun mülküne ve bir tarafı Mehmed b. el-Hâc Mustafa mülküne ve bir tarafı yine kendi mülküme ve bir tarafı tarîk-i âmma müntehî tûlen kırk zirâ‘ ve arzen on sekiz zirâ‘ hesâb-ı şatrancî üzere yedi yüz yirmi zirâ‘ arsa üzerinde mebniye olup dâhiliyyesi iki bâb tahtânî beyti ve iki sofayı ve bi’r-i mâyı ve fırını ve muhavvata zât-ı eşcâr-ı müsmire ve gayr-i müsmireyi ve hâriciyyesi bir bâb fevkānî beyti ve altında ahırı müştemil olup silk-i mülkümde dâhil olan menzilimi cümle tevâbi‘i ile hasbeten lillâhi te‘âlâ vakf-ı sahîh-i şer‘î ile vakf ve habs edip şöyle şart eyledim ki; evvelâ menzil-i mezbûra kendim mutasarrıfe olam ba‘dehû kız karındaşım Muhsine Hatun’un kızları Hayrünnisâ Hatun ve Nesli Hatun ve yine mezbûre Muhsine Hatun’un oğlu İsmail’in kızı Fâtıma Hatun ve utekāmdan olan Kamile ale’s-seviyye mutasarrıfe ve sâkine olup mukābelesinde her Cum‘a gecesi üçer İhlâs-ı şerîfi tilâvet edip sevâbını rûhuma hibe ve ihdâ eyleyeler ba‘dehünne evlâd-ı evlâdlarını batnen ba‘de batnin karnen gıbbe karnin mutasarrıfe olup ba‘de’l-inkırâz menzil-i mezbûr icâre-i mu‘tâde ile îcâr olunup hâsıl olan icâresinden inde’l-ihtiyâc menzil-i mezkûrun meremmâtına sarf olunup mâ‘adâsı Medîne-i Münevvere sallallâhu te‘âlâ alâ-münevvirihâ fukarâsına irsâl oluna deyu ta‘yîn-i vakf ve şerâit ve tebyîn-i kuyûd ve zavâbıt eyledikde mütevellî-i mezbûr vâkıfe-i mûmâ-ileyhâyı cemî‘ kelimâtında bi’l-müvâcehe tasdîk ve bi’l-müşâhede tahkīk ettikden sonra vâkıfe-i mezbûre iâde-i kelâm edip vakf-ı akār mukayyidân-ı kibâr olan İmâm-ı Azam katında lüzûmdan ârî olmağla vakf-ı mersûmdan rücû‘ edip menzil-i mahdûd-ı mezkûru ke’l-evvel mülküme redd ü teslîm olunmasını taleb ederim deyip mütevellî-i mezbûr cevâb verip lâkin hâl minvâl-i muharrer üzeredir ammâ İmâmeyn kavli üzere sıhhat ve lüzûmuna hükm taleb ederim dedikde hâkim-i mûmâ-ileyh dahi cânib-i vakfı evlâ görüp âlimen bi’l-hilâf vakf-ı mezbûrun lüzûmuna hükmedip mâ-vaka‘a sebt olundu. Fî-evâili Şevvâli’l-mükerrem li-sene selâsîn ve elf. Şühûdü’l-hâl: Muharrem Efendi el-hatîb, Abdurrahman Efendi b. Numan, Receb Efendi b. Osman el-mütevellî, Kıdvetü’l-emâcid İbrahim Bey b. Ali Paşa, İlyas Bey b. ( ) Reis, Talib Çavuş b. Abdullah, İsmail Çelebi b. Hüseyin er-râcil, Bâli Efendi b. Mehmed el-müsta‘id, Mehmed Çelebi b. Yusuf el-müezzin, Yusuf Halîfe b. Bedreddin el-müezzin, Abdullah Halîfe b. Hızır el-kayyım, Halil b. Hızır, Üstâd Rıdvan b. Abdullah, Mehmed Bey b. ( ) el-bevvâbü’s-sultânî, el-Hâc Hüseyin b. Pervîz Bey, Mehmed Dede el-kayyım, Mustafa Çelebi b. Osman, Mehmed Çelebi b. Hızır, Ali Bey b. Mehmed, Yusuf Çelebi b. Abdullah, Mustafa Efendi b. ( ) el-yesârî, İbrahim b. Yusuf, Mehmed b. Ömer el-attâr, Mustafa Çelebi b. el-Hâc Mustafa, el-Hâc Ramazan el-Haffâf, Mustafa Çelebi İlyas, Mehmed Bey b. Hüseyin ve gayruhüm.