Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 107 Hüküm no: 115 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze’de bulunan Sultan Orhan Gazi Evkafı’ndan Kartal ve tevabii mukataasının vergilerinde iki defa indirim yapıldığı Defter-i Muhâsebe-i Haremeyni’ş-şerîfeyn Mukāta‘a-i Kartal ve tevâbi‘ vakf an-evveli Mart tâbi‘-i vakf-ı merhûm Sultân Orhan Gāzî -tâbe serâhu- der-Gekbûze der-uhde-i Seyyid Mehmed Ağa nısf ve Hacı Mustafa Ağa rub‘ ve Süleyman Ağa rub‘ hisse ber-vech-i malikâne. Guruş Aded-i Kalemiye-i mâl 2116,5 Tenzîl-i bâ-hatt-ı hümâyûn-ı şevket-makrûn 150 [Bâkī] 1966,5 Fî 18 L sene 1180 Ba‘dehû defter-i muhâsebe-i Haremeyni’ş-şerîfeyn-i vakf-ı merhûm ve mağfûrun-leh Sultân Orhan Gāzî der-Gekbûze mukāta‘ât-ı Kartal ve tevâbi‘ihâ ve an-evveli Mart sene 1181 Seyyid Mehmed Ağa nısf ve Ebezâde Hacı Mustafa Ağa rub‘ ve Süleyman Ağa rub‘ Guruş Mâl-ı aded-i kalemiye ve tenzîl 1966,5 Tenzîl-i def‘a-i sâniye ber-mûceb-i hatt-ı hümâyûn-ı şevket-makrûn bâ-fermân-ı âlî el-vâki‘ fî 18 Zilka‘de sene 1181 100 Yalnız bin sekiz yüz altmış altı buçuk guruşdu 1866,5 Bin yüz seksen senesine mahsûben Haremeyni’ş-şerîfeyn mukāta‘âtı mâllarından bâ-hatt-ı hümâyûn tenzîl olunan mâldan mâ‘adâ bu def‘a dahi fukarâ-i ra‘iyyetin hâllerine merhameten def‘a-i saniye olmak üzere seksen bir senesine mahsûben ma‘lûmü’l-mikdâr mâl tenzîl olunmak murâd-ı hümâyûn[-ı] hazretleri [hazret-i] şehin-Şâhî buyrulmakla mikdâr-ı tenzîlleri kalemine kayd ve ashâb-ı mâlikâne yedlerine sûret fîmâ-ba‘d mahâllerinde sicillâta sebt olunduğunu müş‘ir vürûd eden i‘lâmları zabt ve defterhâne-i âmirede zab olunmak bâbında mübârek hatt-ı hümâyûn-ı merhamet-makrûn şeref-rîz-i sudûr ve şeref-bahş-ı sudûr olan mübârek hatt-ı hümâyûn-ı inâyet-makrûn mûcebince hâlâ bi’l-fi‘il başdefterdâr olan iftihârü’l-ümerâ ve’l-ekâbir sa‘âdetlü İbrahim Sarim Efendi -dâme uluvvuhû-ya hitâben fermân-ı âlîşân sâdır olmağın efendi-i mûmâ-ileyh ma‘rifetleriyle asıl müfredât defteri Haremeyni’ş-şerîfeyn Muhâsebesi’ne kayd ve hıfz olunup iktizâ eden sûretleri ve ilmühaberleri verildiği ve defter-i mezkûrda bâlâda muharrer ve mastûr Kartal ve tevâbi‘i mukāta‘asının mâlından dahi yüz guruş hatt ü tenzîl olunmağla ber-mûceb-i şurût-ı hatt-ı hümâyûn-ı merhamet-makrûn ve sâdır olan fermân-ı celîlü’ş-şân-ı mevhebet-nümûn işbu sûret mukāta‘a-i mezbûrun vâki‘ olduğu kazânın sicillâtına sebt olunduğunu müş‘ir i‘lâmı gelüp kalemine kayd ve hıfz etdirilmek içün nizâm-yâfte olan tenzîlât zımnında verilen sûretleri musarrah ve şurûta mürâ‘at olunmak üzere mukāta‘a-i merkūmenin mutasarrıfları es-Seyyid Mehmed Ağa ve Hacı Mustafa Ağa ve Süleyman Ağa taraflarına işbu sûret verildi. [Fi’t]-târîhi’l-mezkûr.