Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 319 Hüküm no: 270 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Mustafa’nın mülkiyet üzere tasarruf ettiği evin Şirin Hatun bt. Abdullah’ın vakfı olduğu Mahmiye-i İstanbul’da Haremeyn-i Muhteremeyn Vakfı’na bi’l-fi‘il mütevellî olan bâ‘isü hâze’l-kitâb fahrü’l-akrân Veli Bey b. Abdülmennan nâm bevvâb-ı sultânî meclis-i şer‘-i hatîr-i lâzımü’t-tevkīrde menzil-i âti’l-beyâna mülkiyyet zu‘mu ile vâzı‘ü’l-yed olan Ali Çelebi b. Mustafa nâm kimesne mahzarında üzerine takrîr-i da‘vâ edip bundan akdem mahmiye-i merkūmede merhûm Mahmud Paşa-yı Velî Câmi‘-i şerîfi mahallesinde sâkine iken vefât eden merhûme Şirin Hatun bt. Abdullah mahalle-i merkūmede vâki‘ tûlen yirmi iki ve arzen on dokuz zirâ‘ arsa üzerinde mebnî tahtânî iki bâb oda ve bir matbah ve bir ahır ve muhavvatayı muhtevî olup bir tarafı Çizmecibaşı Vakfı ve bir tarafı Kazzâzbaşı Vakfı ve bir tarafı Hümâ Hatun mülkü ve bir tarafı tarîk-i hâs ile mahdûd olan mülk menzilini Medîne-i Münevvere fukarâsına vakfedip şart-ı vâkıf-ı mezbûre üzere menzil-i merkūm hâlâ vakfa âid ve racî‘ olmuşiken mezbûr Ali Çelebi bi-gayrı vech-i şer‘î tasarruf eder vâki‘ hâl suâl olunup menzil-i merkūmun vakf-ı mezbûr için zabt ettirilmesi matlûbumdur dedikde gıbbe’s-suâl mezkûr Ali Çelebi menzil-i merkūmun ber-vefk-i muharrer vakfiyyetini münkir olmağla hakīkat-i hâl ehl-i mahalle-i merkūmeden tefahhus ve istihbâr olundukda udûl-i Müslimînden Ya‘kub Beşe b. Ahmed ve Ömer Çavuş b. Ali ve Ahmed Çelebi b. İbrahim el-müezzin ve Fazlı Çelebi b. Mehmed ve Mehmed Çavuş b. Mahmud Çavuş ve Mehmed Çelebi b. Hasan nâm kimesneler meclis-i şer‘-i şerîfe li-ecli’ş-şehâde hâzırûn olup gıbbe’l-istişhâd fi’l-hakīka menzil-i merkūm ber-vefk-i muharrer vâkıfe-i mezbûrenin Medîne-i Münevvere fukarâsına vakfı olduğu ma‘lûmumuzdur şart-ı vâkıfe-i mezbûre üzere hâlâ menzil-i merkūm Medîne-i Münevvere vakfına âid olmuşdur. Bu husûsa şâhidleriz şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mâ-vaka‘a bi’t-taleb sebt olundu. Fî-evâili Muharremi’l-harâm li-sene ihdâ ve selâsîn ve elf. Şühûdü’l-hâl: Derviş Çavuş b. Ramazan el-kāidü’s-sultânî, Lutfullah Ağa b. Mehmed el-müteferrika, İbrahim Çavuş b. Abdullah el-kāidü’s-sultânî, Mehmed Çelebi b. Hüdaverdi, Ahmed Çelebi b. Mustafa, Musa b. Süleyman, Ramazan b. Gâzi, Mehmed b. Süleyman, Yusuf b. Ahmed ve gayruhüm.