Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 321 Hüküm no: 272 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hızır Ağa’nın ev vakfı Elhamdülillâhi el-vâkıfu alâ-külli hâlin el-muttali‘u alâ-mâ fi’l-bâl ve’s-salâtü alâ-Muhammedin seyyidü erbâbi’l-fazl ve’l-kemâl ve alâ-âlihî ve ashâbihi hayru ashâbin ve âl ve ba‘d işbu vakfiyye-i sahîha-i şer‘iyye ve bu enîka-i sarîha-i mer‘iyyenin sâhibesi ve hayrât [ve] hasenâtın râgıbesi kıdvetü’l-muhadderât Âişe Hatun bt. Hızır Ağa meclis-i şer‘-i hatîr-i lâzımü’t-tevkīrde vakf-ı âti’l-beyâna li-ecli’t-tescîl mütevellî nasb ve ta‘yîn eylediği fahrü’l-akrân Veli Bey b. Abdülmennan nâm bevvâb-ı sultânî mahzarında ikrâr-ı tâm ve takrîr-i ani’l-merâm edip mahmiye-i İstanbul’da el-Hâc Bayram mahallesinde vâki‘ dâhiliyye ve hâriciyye iki muhavvatayı muhtevî olup muhavvata-i dâhiliyyesi iki beyt-i süflîyi ve bir sofayı ve iki beyt-i ulvî ve matbah ve kenîf ve cüneyneyi ve muhavvata-i hâriciyyesi iki beyt-i ulvî ve ıstablı ve bir hücre ve kenîfi müştemil olup bir tarafdan Mehmed Çelebi b. Kasım mülkü ve bir tarafdan Fâtıma Hatun bt. Ahmed mülkü ve iki tarafdan tarîk-i âm ile mahdûd olan mülk menzilimi hasbeten lillâhi te‘âlâ vakfedip süknâsını evvelâ kendi nefsime ba‘de’l-vefât kız karındaşım kızı Ümmühânî bt. Receb nâm hatuna ve evlâdına ve evlâd-ı evlâdına ba‘de’l-inkırâz îcâr olunup hâsıl olan ücreti her sene Medîne-i Münevvere fukarâsına irsâl ola deyu şart ve ta‘yîn eylediğimden sonra menzil-i merkūmu mütevellî-i mezbûra teslîm eyledim ol dahi kabz [ve] tesellüm edip sâir mütevellîler gibi tasarruf eyledi dedikde vâkıfe-i mezbûreyi ikrâr-ı meşrûhunda mütevellî-i merkūm vicâhen tasdîk eyledikden sonra vâkıfe-i mezbûre takrîr-i da‘vâ edip vakf-ı mezbûrun sıhhatinde iştibâh yokdur lâkin İmâm-ı Azam ve hümâm-ı akdem Ebû Hanife el-Kûfî mezhebinde sıhhat lüzûmu müstelzim olmayıp rücû‘ emr-i meşrû‘ olmağın menzil-i mezbûru istirdâd ederin dedikde gıbbe’s-suâl mütevellî-i mezbûr cevâbında İmâm-ı mûmâ-ileyh mezhebinde sıhhat lüzûmu müstelzim değildir lâkin İmâmeyn-i hümâmeyn mezheblerinde sıhhat lüzûmdan müfârık olmamağın onların mezhebleri üzere hükm-i şer‘î taleb edip menzil-i mezbûru teslîmden imtinâ‘ edicek hâkim-i muvakkı‘-ı hâze’l-kitâb tûbâ-lehû ve hüsnü-meâb cânib-i vakf-ı mezbûra nazar ve mubtıl-i hayr olmakdan hazer edip İmâmeyn-i müşârun-ileyhimâ mezhebleri üzere hükmettikden sonra min-ba‘d vakf-ı mezbûr vakf-ı lâzım olup tebdîl ve tağyîri adîmü’l-ihtimâl olduğu “Fe men-beddelehû ba‘de mâ-semi‘ahu fe-innemâ ismühû ale’llezîne yübeddilûnehû innellâhe semî‘un alîm” ve ecrü’l-vâkıf ale’l-hayyi’l-cevâdi’l-kerîm. Cerâ zâlike ve hurrire fî-evâili şehri Rebî‘i’l-âhir li-sene ihdâ ve selâsîn ve elf. Şühûdü’l-hâl: Osman Efendi b. Ramazan el-imâm, Maksud b. Ali el-müezzin, Kasım b. Abdullah, Abdurrahman b. Receb, Rıdvan [b.] Abdullah ve gayruhüm.