Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 322 Hüküm no: 273 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü bt. Mehmed tarafından kiracısı olduğu evin tamirine ne kadar masraf yaptığının tespiti Mahmiye-i İstanbul’da Haremeyn-i Şerîfeyn Evkāfı’ndan Tülbentçi Hüsam mahallesinde vâki‘ lede’l-ahâlî ma‘lûmü’l-hudûd tûlen ve arzen hesâb-ı şatrancî üzere iki yüz on zirâ‘ arsa üzeri mebnî fevkānî ve tahtânî büyût-ı müte‘addideyi müştemil menzilin icâre-i mu‘accele ve yevmî ikişer akçe icâre-i müeccele ile bi’l-fi‘il müste’ciresi olan bâ‘isetü hâzihi’l-kitâb Ümmü bt. Mehmed nâm hatun meclis-i şer‘de takrîr-i kelâm edip menzil-i mezbûr bundan akdem bi’l-külliye harâba müşrif olup imâret ve meremmet <> muhtâc oldukda izn-i şer‘ ve ma‘rifet-i mütevellî ile icâre-i mu‘acceleme mahsûb olmak üzere müceddeden imâret ve meremmet etmişidim. Hâlâ kıbel-i şer‘den üzerine varılıp vâki‘ hâl keşf ve müşâhede olunup ba‘de’l-keşf müceddeden imâret ettiğim ebniyesinin ne mikdâr akçeye tahammülü vardır tahrîr olunması matlûbumdur dedikde savb-ı şer‘den Mevlânâ Hüseyin Efendi ve Hâssa mi‘mârlardan [85a] Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûre varılıp vâki‘ hâl mütevellî-i merkūm mahzarında keşf [ve] müşâhede olundukda fi’l-hakīka menzil-i mezbûr ber-vech-i muharrer müceddeden binâ olunmuş bulunup bu cümleye sarf olunan kereste-i mütenevvi‘asının üstâdiyye ve ırgadiyye ve hammâliyeleriyle cem‘an ba‘de külli’l-hesâb on bin akçe nıkzından mâ‘adâ elli iki bin iki yüz on altı akçeye tahammülü vardır noksân ile olmaz deyu mi‘mâr-ı mezbûr ve sâir ehl-i vukūf Müslimîn ittifâk eylediklerini mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-vaka‘a isre’t-taleb ketb olundu. Fî-evâsıtı şehri Rebî‘i’l-âhir li-sene ihdâ ve selâsîn ve elf. Şühûdü’l-hâl: Hasan Bey b. Ali el-bevvâb, Mehmed Bey b. Gazanfer el-bevvâb, Mustafa Çelebi b. ( ) bevvâb, Halil [b] Receb ve gayruhüm.