Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 323 Hüküm no: 274 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atmeydanı Helvacıbaşı mahallesinde bulunan vakıf evin Yusuf Ağa b. Abdülmennan tarafından kiralandığı Mütevellî-yi merkūm meclis-i şer‘de sâhibü’l-kitâb umdetü’l-emâsil ve’l-akrân Yusuf Ağa b. Abdülmennan mahzarında bi’t-tevliye ikrâr ve takrîr-i kelâm edip evkāf-ı mezbûreden mahmiye-i merkūmede Atmeydanı kurbünde Helvacıbaşı mahallesinde vâki‘ dâhiliyye ve hâriciyye iki muhavvatayı muhtevî olup muhavvata-i dâhiliyyesi fevkānî üç bâb odayı ve bir sofa ve bir dahlîz ve şehnişîn ve bir dîvânhâneyi ve tahtında iki bâb odayı ve bir mahtabı ve iki <> bi’r-i mâyı ve cüneyneyi ve mukābelesinde bir matbah ve fevkānî bir kasrı ve tahtında bir bâb oda ve bir kilârı ve bir bâb fırın odasını ve hamâm ve kenâyif ve iki kıt‘a cüneyneyi ve orta kapı yanında iki bâb küçük odayı ve muhavvata-i hâriciyyesi fevkānî dört bâb odayı ve dahlîzi ve ıstablı ve fevkinde bir oda ve bir dîvânhâne ve kenîf ve bi’r-i mâyı ve muhavvatayı ve taşra kapı yanında bir bâb küçük odayı müştemil olup bir tarafdan Receb Efendi tasarrufunda olan vakıf menzil ve bir tarafdan Davud Efendi mülkü ve tarafeynden tarîk-i âm ile mahdûd olan menzil yevmî on beş akçe icâre-i müeccele ve mu‘accele ile Nuh Ağa tasarrufunda iken mezkûr Nuh Ağa fevt olup evlâd-ı olmamağla vakfa âid olup mahlûl oldukda tâlibîne arz olunup ragabât-ı nâs münkatı‘a oldukdan sonra mûmâ-ileyh Yusuf Ağa yevmî on beş akçe icâre-i müeccele-i kadîmesi ve iki kerre yüz bin ve beş bin akçe icâre-i mu‘accele ile ve meremmet-i lâzıme ve müceddeden binâsını mu‘accelesine mahsûben kendi mâlında etmek üzere istîcâra tâlib olup ziyâde ile tâlib-i âhar zuhûr etmeyip vech-i meşrûh üzere îcâr vakfa enfa‘ olmağın ben dahi zikr olunan menzil-i mahdûdu bi-cümleti’t-tevâbi‘ târîh-i kitâbdan vech-i sâlifü’l-beyân üzere ücreteyn-i merkūmeteyn ile mûmâ-ileyh Yusuf Ağa’ya tevliyetim hasebi ile îcâr ve teslîm eyledim ol dahi ber-vech-i muharrer istîcâr ve kabûl ettikden sonra icâre-i mu‘accelesi olan meblağ-ı mezbûr iki kerre yüz bin ve beş bin akçeyi yedinden vakıf için alıp kabz <> ve defter-i evkāfa minvâl-i muharrer üzere kayd edip mazmûn-ı mezkûru müştemil yedine tezkire verdim. Ba‘de’l-yevm mâh be-mâh icâre-i müeccelesini cânib-i vakfa edâ edip keyfe mâ yeşâ mutasarrıfı olsun dedikde gıbbe’t-tasdîk mâ-hüve’l-vâkı‘ bi’t-taleb ketb olundu. Tahrîren fî-evâili şehri Rebî‘i’l-âhir li-sene ihdâ ve selâsîn ve elf. Şühûdü’l-hâl: Umdetü’l-a‘yân Behram Ağa b. ( ) Kethüdâ-i hazret-i ağa, kıdvetü’l-emâsil İbrahim Ağa b. ( ), zahrü’l-a‘yân sefer Çavuş b. ( ), fahrü’l-akrân Mehmed Ağa b. ( ) Tâbi‘-i Hafız Ahmed Paşa, Bayezid Cavuş b. ( ), Şeyh Derviş Mehmed, Hayr Çelebi b. ( ) el-cündî, Hasan Bey b. ( ) el-bevvâb, Ali Çelebi b. Halil el-mi‘mâr, Hasan Çelebi b. ( ) el-mi‘mâr, Murad Bey b. ( ), Ali Beşe Çukadâr, Mustafa Efendi b. ( ) el-müderris ve gayruhüm.