Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 324 Hüküm no: 275 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foça’nın Kale-i cedid yakınındaki el-Hac Hızır Reis b. Sefer’in bağının vakfiyesi Vech-i tahrîr-i hurûf budur ki; kazâ-i Foça’ya tâbi‘ Kal‘a-i cedîd sâkinlerinden sâhibü’l-hayrât ve’l-hasenât el-Hâc Hızır Reis b. Sefer nâm kimesne meclis-i şer‘de husûs-ı âti’z-zikr için mütevellî nasb olunan Mustafa Kethüdâ b. Abdülkadir nâm kimesne muvâcehesinde ikrâr-ı sahîh-i şer‘î kılıp Kal‘a-i merkūme kurbünde Şaylıdere demekle ma‘rûf mevzi‘de bir cânibi Mehmed Efendi b. el-Hâc Ca‘fer mülkü ve bir cânibi tarîk-i âm ile ve bir cânibi vâdi ile ve bir cânibi dahi tarîk-i âm ile mahdûd olan bağımı içinde olan eşcâr-ı müsmire ve gayr-i müzmiresiyle mâdâm kayd-ı hayâtda olam mezkûr bağın gallâtı bana meşrût ola ben fevt oldukdan sonra sulbî oğlum Ca‘fer’e ve sulbiye kızım Belkıs’a ve evlâdlarına ve evlâd-ı evlâdlarına neslen ba‘de neslin batnen ba‘de batnin karnen ba‘de karnin ve ba‘de’l-inkırâz Ka‘betü’l-mutahhara’da sâkin fukarâya sarf olunmak üzere mâlımdan ifrâz edip vakf-ı sahîh ile vakf ve şart eyleyip mütevellî-i merkūm el-Hâc Mustafa’ya teslîm eylemişdim. El-hâletü hâzihî imâm-ı hümâm seyyidü’l-enâm İmâm-ı Azam Ebû Hanife-i Kûfî mezheb-i latîf ve kavl-i şerîfleri üzere vakf-ı sahîh olup lâkin vakf-ı lâzım olmamağla merkūm bağın vakfiyyetinden rücû‘ mülk olmasını taleb ederim suâl olunsun dedikde gıbbe’s-suâl mütevellî-i merkūm el-Hâc Mustafa cevâb verip fi’l-vâki‘ imâm-ı hümâm hazret-i Numan b. Sâbit kavl-i şerîfleri üzere vakf-ı lâzım İmâmeyn-i hümâmeyn hazret-i İmâm Ebû Yusuf ve Muhammed kavl-i sedîd ve mezheb-i latîfleri üzere vakf-ı sahîh oldukda sahîhden lüzûm mufârık olmaz mûmâ-ileyhimâ hazretlerinin kavl-i latîf ve mezheb-i şerîfleri üzere mezkûr bağın vakfiyyetinin sıhhatine ve lüzûmuna hükmolunmak taleb ederim dedikde cânib-i vakf evlâ ve taraf-ı hayrı olmağla imâm-ı hümâm seyyidü’l-enâm İmâm-ı Azam hazretlerinin kavl-i şerîfleri üzere mezkûr bağın vakfiyyetinin sıhhatine ve müşârun-ileyhimâ İmâmeyn-i hümâmeyn hazretlerinin kavl-i şerîfleri ve mezheb-i müstakīmleri üzere merkūm bağın vakfiyyetinin sıhhatine hükmolunup mâ-cerâ [85b] mâ-cerâ ber-sebîl temessük olunup yed-i tâlibe vaz‘ olundu ki vakt-i hâcetde ibrâz eyleyip ihticâc edineler. “Fe men-beddelehû ba‘de mâ-semi‘ahu fe-innemâ ismühû ale’llezîne yübeddilûnehû”. Cerâ zâlike ve hurrire fî-evâili şehri Cumâdelûlâ li-sene hamse ve aşere ve elf. Şühûdü’l-hâl: Fahrü’l-kuzât Kemal Efendi b. Memi, zahrü’l-vülât Mehmed Efendi b. Ca‘fer, Ahmed Çelebi el-müderris, Seyyid Ali Efendi b. Seyyid Ahmed Efendi, Hacı Ali b. ( ), Ali Beşe b. Pervâne, Hızır bin Yusuf, Mustafa b. Muttalib, İbrahim b. ( ) el-mübâşir ve gayruhüm.