Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 325 Hüküm no: 276 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüp Takyeci mahallesinde bulunan vakıf evin vakfiyesine aykırı olarak el koyan mütevellisi Ahmed Ağa b. Musa aleyhine açılan dava Mahmiye-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan Veli Bey b. Abdülmennan nâm bevvâb-ı sultânî meclis-i şer‘de menzil-i âti’l-beyâna Hazret-i Eyüb evkāfı <> beytülmâlına âid olmak zu‘mu ile vâzı‘ü’l-yed idiği ale’n-nehci’l-mu‘teber sâbite olan bi’l-fi‘il evkāf-ı mezbûre mütevellîsi Ahmed Ağa b. Musa mahzarında üzerine takrîr-i da‘vâ edip medîne-i Eyüb mahallâtından Takyeci mahallesinde vâki‘ tûlen yirmi üç ve arzen yirmi iki be-hesâb-ı şatrancî beş yüz elli zirâ‘ arsa üzere mebnî fevkānî ve tahtânî büyût-ı müte‘addideyi ve ahırı ve kenîfi ve bi’r-i mâyı ve cüneyneyi hâvî ve müştemil olup hudûdunun bir tarafı Piyale Bey b. Abdullah mülküne ve bir tarafı Ahmed b. ( ) mülküne ve tarafeyni tarîk-i âmma müntehî olan menzilini hâl-i hayâtında mülk-i mahz-ı sahîhi iken sene selâsîn ve elf Cumâdelâhire’si gurresinde vakfedip süknâsını evvelâ kendi nefsine ba‘dehû ale’s-seviyye zevceleri Fâtıma bt. Yusuf ve Nâzenîn bt. Abdullah ve atîkası Zamâne bt. Abdullah nâm hatunlar ve ba‘de’l-inkırâz fukarâ-i Haremeyn’e şart edip ber-mûceb-i şart-ı vâkıf menzil-i mezbûrun süknâsı ve hakk-ı tasarrufu hâzıra bi’l-meclis olan Fâtıma ve Nâzenîn ve Zamâne’ye âid ve râci‘ iken <> mütevellî-i merkūm Ahmed Ağa bi-gayrı vech-i şer‘î vaz‘-ı yed etmişdir kıbel-i şer‘den üzerine varılıp vâki‘ hâl ahâlî-i mahalleden istihbâr olundukdan sonra mûcebi matlûbumdur dedikde savb-ı şer‘de zeyl-i kitâbda mastûretü’l-esâmî olan Müslimîn ile mahall-i mezbûra varılıp akd-i meclis ve vâki‘ hâl mûmâ-ileyh Ahmed Ağa’dan suâl olundukda cevâbında fi’l-hakīka menzil-i merkūm müteveffâ-yı mezbûrun mülkü olup fevt oldukda zâhirde vâris-i ma‘rûfu olmamağla vakf-ı mezbûrun beytülmâl için zabt eyledim vech-i muharrer üzere vakıf olduğu ma‘lûmum değildir deyu münkir olıcak müdde‘î-yi merkūm Veli Bey’den da‘vâsına muvâfık beyyine taleb olundukda ahâlî-i mahalleden Mehmed Efendi b. Hüseyin ve diğeri Mehmed Efendi b. [İbra]him ve Mustafa Bey b. Fethullah nâm kimesneler meclis-i şer‘a li-ecli’ş-şehâde hâzırûn olup gıbbe’l-istişhâd fi’l-hakīka menzil-i mezbûru vâkıf-ı merkūm bizim huzûrumuzda tafsîl-i merkūm üzere vakfedip süknâsını evvelâ kendi nefsine ba‘dehû zevcetân-ı merkūmetâna ve atîkası Zamâne’ye ba‘de’l-inkırâz fukarâ-i Haremeyn’e şart eylemişdir vech-i muharrer üzere menzil-i merkūmun vakfiyyetine şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle vakfiyyetine hükm birle mâ-vaka‘a isre’t-taleb ketb olundu. Fî-evâhiri şehri Rebî‘i’l-âhir li-sene ihdâ ve selâsîn ve elf. Şühûdü’l-hâl: Mehmed Bey b. Ahmed el-cündî, Ferhad Bey b. ( ), el-bevvâb, Hüseyin Bey b. Ali, Süleyman Bey b.( ) el-bevvâb, Mustafa Bey b. ( ) el-kâtib, Bâli b. Abdullah, Süleyman b. Abdullah, Veli Beşe b. Mustafa el-kâtib.