Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 326 Hüküm no: 277 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ali’nin kiracısı olduğu vakıf evin tasarruf hakkını Rıdvan b. Abdullah’a devrettiği <> Mahmiye-i İstanbul’da Haremeyn Evkāfı’ndan Hoca Paşa mahallesinde vâki‘ etrâf-ı selâseyi vakf-ı mezbûr ve bir tarafı tarîk-i âm ile mahdûd olup fevkānî ve tahtânî iki bâb oda ve bir tahtabendi muhtevî menzilin her ayda yirmi akçe icâre-i müeccele ile müste’ciri olan Hasan b. Ali nâm mahfil-i meclis-i şer‘de sâhibü’l-kitâb Rıdvan b. Abdullah mahzarında ikrâr edip bundan akdem merkūm Rıdvan’ın sâkin olduğu menzil benim menzil-i mahdûduma muttasıl olmağla mâ-beynimizde münâza‘ât-ı kesîre cereyân etmişidi. El-hâletü hâzihî menzil-i merkūmun hakk-ı tasarrufunu bi’l-fi‘il vakf-ı mesfûr mütevellîsi olup hâzır bi’l-meclis fahrü’l-akrân Veli Bey b. Abdülmennan ma‘rifeti ile merkūm Rıdvan’a on bin fıddî Osmânî akçe mukābelesinde tefvîz eyledim ol dahi minvâl-i muharrer üzere tefevvüz ettikden sonra bedel-i tefvîz olan meblağı yedinden bi’t-tamâm ahz u kabz eyledim ba‘de’l-yevm cânib-i vakfa ta‘yîn olunan beher şehr yirmi akçe icâresini mâh be-mâh teslîm edip emsâli gibi mutasarrıf olsun min-ba‘d benim alâkam kalmadı dedikde gıbbe’t-tasdîk mâ-vaka‘a isre’t-taleb ketb olundu. Fî-evâili Cumâdelûlâ li-sene ihdâ ve selâsîn ve elf. Şühûdü’l-hâl: Davud Efendi b. ( ) el-imâm, Habib b. Ahmed, Mustafa b. ( ) el-müezzin, Ali b. Veli, Ahmed Çelebi b. ( ) el-câbî, Mehmed Bey b. ( ) el-bevvâb ve gayruhüm.