Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 328 Hüküm no: 279 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinanağa mahallesinde bulunan vakıf hamamın kiracısı tarafından tamir ettirildikden sonra kulanım hakkından vazgeçerek mütevellisine teslim ettiği Mahmiye-i İstanbul’da Haremeyn Vakfı’ndan Sinan Ağa mahallesinde vâki‘ vakf-ı mezbûre intimâ ile tahdîdden müstağnî ferd hamâmın bi’l-fi‘il mütevellî <> olan Veli Bey b. Abdülmennan <> nâm bevvâb-ı sultânî mahfil-i kazâya ihzâr ve <<üzerine >> ve mahzarında takrîr-i kelâm edip sene seb‘a ve ışrîn ve elf Cumâdelâhiresi gurresinde hamâm-ı mezbûr harâba müşrif olup imâret ve meremmete muhtâc oldukda târîh-i <> mezbûrda vakf-ı mesfûr mütevellîsi olan Hamza Bey b. Mehmed nâm bevvâb-ı sultânî beher sene dörder bin akçe olan kıstü’l-yevmine mahsûb olmak üzere bana imârete izin vermeğin kendi mâlımdan doksan dokuz bin sekiz yüz otuz yedi akçe harc ve keşf ettirip yedime hüccet-i mücmele alıp ile’l-ân dört sene zabt edip senevî dörder bin akçe kıstından hüccet-i şer‘iyyem mûcebince on altı bin akçesin haklaşmış idim. Hâlâ fâriğ olup hamâm-ı mezbûru mütevellî-i merkūm Veli Bey’e teslîm eyledim. Âhara îcâr etsin bâkī kalan seksen üç bin sekiz yüz otuz yedi akçe hakkımı hüccet-i mücmele mûcebince taraf-ı vakfdan taleb ederim dedikde gıbbe’s-suâl mütevellî-i merkūm cevâbında hâl minvâl-i muharrer üzeredir fi’l-hakīka bâkī akçesi merkūm el-Hâc Hüseyin’e cânib-i vakfdan teslîm olunup hamâm-ı merkūm âhara îcâr olunmak vakfa enfa‘dır deyip kavline muvâfık sikāt dahi haber vermeğin bi’l-fi‘il Dârüssaâde ağası hazretlerinin ma‘rifetleriyle mâl-ı vakfdan meblağ-ı mezbûrun edâsına mütevellî-i merkūma tenbîh birle mâ-vaka‘a ketb olundu. Fî-evâhiri Cumâdelûlâ li-sene ihdâ ve selâsîn ve elf. Şühûdü’l-hâl: Derviş Mehmed b. Mehmed, Mustafa Bey b. ( ) el-cündî, Hasan Bey b. Ali el-bevvâ[b], Ali Beşe b. Maksud er-râcil.