Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 330 Hüküm no: 283 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn mütevellisi Veli Bey tarafından Galata ve Kasımpaşa’da bulunan vakfa ait iki evin tamirinin yaptırıldığı Dârü’s-saltanati’l-aliyyeti Kostantıniyyetü’l-mahmiye[de] hâlâ Haremeyn-i Muhteremeyn Evkāfı mütevellîsi olan Veli Bey b. Abdülmennan nâm bevvâb-ı sultânî meclis-i şer‘de takrîr-i merâm edip evkāf-ı mezbûreden mahrûse-i Galata’da Emekyemez mahallesinde vâki‘ bir bâb menzilin bir bâb odası mürûr-ı eyyâmla harâba müşrif olup bi’l-külliye münhedim oldukda bundan akdem izn-i şer‘ ve mâl-ı vakf-ı mezbûr ile müceddeden binâ ve imâret edip ve hâric-i Kasımpaşa’da eş-Şeyh Bedreddin mahallesinde vâki‘ menzilin mevâzi‘-i müte‘addidesi harâba müşrif oldukda kezâlik izn-i şer‘ ve mâl-ı vakf-ı mezbûr ile imâret ve meremmet etmişidim ve muhavvatası içinde iki bâb tahtânî oda müceddeden binâ etmişidim. Hâlâ üzerine varılıp keşf olunsun dedikde fi’l-hakīka hâl-i minvâl tahrîr olmağın mecmû‘-ı ebniye ve meremmetinin ba‘de’l-hesâb yirmi iki bin dört yüz akçe tahammülü vardır deyu Mi‘mâr Hasan Çelebi ve sâir ehl-i vukūf ittifâkları kayd olundu. Fî-evâili Cumâdelâhire li-sene ihdâ ve selâsîn ve elf Şühûdü’l-hâl: Mehmed b. Abdullah, Ahmed b. Receb, Mehmed b. Turhan, Ali b. Ramazan, Mustafa b. ( ), Mehmed b. Mustafa ve gayruhüm.