Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 331 Hüküm no: 284 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiracısı olduğu evi tamir ettirmek isteyen Ömer Çavuş’un yapacağı masrafın tespitini istemesi Mahmiye-i İstanbul’da Haremeyn Evkāfı’ndan olup fevkānî ve tahtânî büyût-ı müte‘addideyi müştemil bir tarafdan Canfeda Hatun Vakfı ve bir tarafdan Ferhad Halîfe Vakfı ve bir tarafdan Mustafa Bey Vakfı ve bir tarafdan tarîk-i âm ile mahdûd tûlen ve arzen be-hesâb-ı şatrancî iki yüz kırk yedi zirâ‘ arsa üzere mebnî yirmi iki bin akçe icâre-i mu‘accele ve yevmî iki akçe müeccelesi olan menzilin müste’ciri Ömer Çavuş b. Mustafa meclis-i şer‘de bi’l-fi‘il evkāf-ı mezbûre mütevellîsi olan Veli Bey b. Abdülmennan mahzarında takrîr-i kelâm edip menzil-i mezbûr harâba müşrif olup bi’l-külliye tecdîd ve ta‘mîre muhtâc olmağın ihyâen li’l-vakf hâlâ müceddeden binâ olmak cânib-i vakfa ve bana evlâ olmağın ma‘rifet-i mütevelliyle menzil-i mezbûrun nıkzı keşf ve tahmîn olundukdan sonra nıkzından mâ‘adâ ne mikdârı akçe harc olunursa icâre-i mu‘accele-i kadîmeme mahsûben kendi mâlımla arsa-i merkūme üzerine murâd ettiğim tarz üzere müceddeden binâ ihdâsına kıbel-i şer‘den üzerine varılıp menzil-i mezbûrun arsası keşf ve mesâha olundukdan sonra vech-i muharrer üzere binâ ihdâsına izin verilmek taleb ederim dedikde savb-ı şer‘den Mevlânâ es-Seyyid Mehmed Efendi ve Hâssa mi‘mârlardan Üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp keşf ve mesâha olundukda fi’l-hakīka menzil-i mezbûrun arsası harâba müşrif olup vech-i muharrer üzere müste’ciri merkūm kendi mâlıyla müceddeden binâ etmek tarafeyne evlâ ve enfa‘dır menzil-i mezbûrun nıkzı on iki bin akçe ancak eder deyu mi‘mâr-ı mezbûr ve sâir ehl-i vukūf Müslimîn ittifâk ettiklerinde vâki‘ hâl mevlânâ-yı mezbûr mahallinde tahrîr ve ba‘dehû gelip ihbâr etmeğin binâya izin verilip ketb olundu. Fî-evâsıtı Cumâdelâhire li-sene ihdâ ve selâsîn ve elf. Şühûdü’l-hâl: Sinan Subaşı [b.] Abdullah, Mehmed Ağa b. Abdullah, Yahya b. Mustafa, Ramazan b. ( ), Ali Çelebi b. ( ).