Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 333 Hüküm no: 286 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasından kendisine intikal ettiğini iddia eden Mehmed b. Mustafa’nın tasarrufunda olan evin Nisa Hatun Vakfı olduğu Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Veli Bey b. Abdülmennan meclis-i şer‘de menzil-i âti’l-beyâna mülkiyyet <<üzere>> zu‘mu ile vâzı‘ü’l-yed olan Mehmed b. Mustafa nâm kimesne mahzarında takrîr-i da‘vâ edip mahmiye-i merkūmede Abdi Subaşı mahallesinde vâki‘ bir tarafı Zülfikār Bey mülkü ve bir cânibi Mahmud Ağa mülkü ve bir cânibi Kurd zimmî mülkü ve bir cânibi tarîk-i âm ile mahdûd olan menzili bundan akdem vefât eden Nisa Hatun mülkü iken vakf-ı sahîh-i şer‘î ile vakfedip süknâ ve tasarrufu evvelâ kendi nefsine ve ba‘dehâ zevc-i Mustafa nâm kimesneye ve mezbûr Mustafa’nın evlâdına ba‘de’l-inkırâz Medîne-i Münevvere fukarâsına şart ve ta‘yîn etmişiken merkūm Mehmed bi-gayrı vechin vaz‘-ı [yed] eder suâl olunup mûcebi matlûbumdur dedikde gıbbe’s-suâl merkūm Mehmed cevâbında menzil-i merkūm babam mezkûr Mustafa’dan bana müntakil mülk-i mevrûsumdur vech-i meşrûh üzere vakıf olduğu ma‘lûmum değildir deyu menzil-i merkūmun vakfiyyetini münkir olmağın mütevellî-i merkūm Veli Bey’den müdde‘âsını mübbeyyine beyyine taleb olundukda udûl-i Müslimînden Ömer b. Halil ve Mustafa b. Ali nâm kimesneler meclis-i şer‘a li-ecli’ş-şehâde hâzırân olup gıbbe’l-istişhâd fi’l-hakīka menzil-i merkūmu vâkıfe-i merkūme Nisa Hatun mülkü iken vakfedip vech-i muharrer üzere süknâ ve tasarrufunu kendinden sonra zevci merkūm Mustafa’ya ve evlâdına ve ba‘de’l-inkırâz fukarâ-i Medîne-i Münevvere’ye şart ve ta‘yîn etmişdir. Bu husûsa şâhidleriz şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebile hükmolunup mâ-vaka‘a ketb olundu. Fî-evâhiri Cumâdelâhire li-sene ihdâ ve selâsîn ve elf. Şühûdü’l-hâl: Ali Bey el-cündî, es-Seyyid Mehmed Efendi el-cündî, Mehmed Bey b. Gazanfer el-kâtib, Ahmed b. Mehmed.