Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 339 Hüküm no: 295 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Halîfe Vakfı’ndan olan evin 90 yıllığına Yahya Çavuş b. Mehmed’e kiralandığı Haremeyn-i Muhteremeyn Evkāfı nâzırı olup Atebe-i aliyye-i sultâniyyede hâlâ Dârüssaâdeti’ş-şerîfe ağası olan iftihârü’l-havâs ve’l-mukarrebîn İsmail b. Abdulmuin hazretleri taraf-ı karînü’ş-şereflerinden îcâr-ı âti’z-zikre vekîl olup hasm-ı câhid-i şer‘î mahzarında nehc-i mu‘teber-i mer‘î üzere şer‘an vekâleti sâbite olan fahrü’l-a‘yân Muhâsib Ahmed Efendi b. Mehmed meclis-i şer‘de sâhibü hâze’l-kitâb Yahya Çavuş b. Mehmed mahzarında bi’l-vekâle ikrâr-ı tâm ve takrîr-i kelâm edip müvekkilim nâzır-ı müşârun-ileyh hazretleri Dârüssaâde ağalarından olup vefât eden merhûm Abbas Halîfe hâl-i sıhhatinde icâresi her sene fukarâ-i Haremeyn’e irsâl olunmakiçin akār iştirâsını şart ve ta‘yîn ettiği nükūd-ı mevkūfesiyle mezbûr Yahya Çavuş’dan bundan akdem üç yüz yetmiş bin akçeye Evkāf-ı Haremeyn’e mülhak olmak üzere iştirâ edip mahmiye-i merkūmede Burgaz Halil Paşa mahallesinde vâki‘ fevkānî ve tahtânî yirmi dört bâb odayı ve bi’r-i mâ ve kenîf ve mahzeni müştemil olup bir tarafı Menahim v. Avraham Yahudi mülkü ve bir tarafı Mehmed Ağa vakfı ve iki tarafı tarîk-î âm ile mahdûd olup tûlen ve arzen be-hesâb-ı şatrancî üzere dört yüz yirmi dokuz zirâ‘ arsa üzere mebnî olan menzili meremmet-i lâzımesi kendi mâlından edip mâh be-mâh icâre-i müeccelesini merhûm-ı müşârun-ileyh Abbas Halîfe vakfına edâ etmek üzere târîh-i kitâb şehri gurresinden doksan yıl tamâmına varınca her üç yılda bir akd-i cedîd olup intihâsı akd-i sâninin ibtidâsı olmak üzere tecdîd-i akde muhtâc olmaksızın icâre-i tavîleyi tecvîz eden fukahâ-yı zevi’l-elbâb kavilleri üzere icâre-i tavîle-i mu‘tâde ile beher sene yirmi bin akçe icâre-i müeccele ile mezbûr Yahya Çavuş’a müvekkilim nâzır-ı müşârun-ileyh tarafından vekâleten îcâr ve teslîm eyledim ol dahi vech-i muharrer üzere istîcâr ve kabûl eyledi. Ba‘de’l-yevm müddet-i merkūme tamâmına değin yevmî elli beş buçuk akçe hesâbınca beher şehr bin altı yüz altmış beş akçe icâre-i müeccelesini mâh be-mâh cânib-i vakfa bi’t-tamâm teslîm edip emsâli gibi mutasarrıf olsun dedikde gıbbe’t-tasdîki’ş-şer‘î menzil-i merkūmun ücret-i merkūmesine mahalle-i merkūme sükkânından Bâli b. Yagob ve Baruh v. Yakut nâm Yahûdiler tarafından emr ve kabûlü hâvî kefâletle kefîl oldukdan sonra vech-i muharrer üzere îcâr min-külli vech vakfa evlâ ve enfa‘dır deyu sikātdan cemm-i gafîr haber vermeğin mâ-vaka‘a bi’t-taleb ketb olundu, Fî-evâsıtı Recebi’l-esam li-sene ihdâ ve selâsîn ve elf. Şühûdü’l-hâl: Kasım Ağa b. Abdullah el-bevvâbü’s-sultânî, Mehmed Ağa b. Ramazan el-bevvâbü’s-sultânî, Mehmed Bey b. Kasım el-bevvâbü’s-sultânî, İsmail Çelebi b. Rıdvan Kâtib-i muhâsebe, Hasan Ağa b. ( ) Nâzır-ı râh-ı âb, Mehmed Ağa b. Abdülmennan Reisü’l-mi‘mârini’l-hâss, İshak Efendi b. ( ) el-bevvâbü’s-sultânî, İsmail Bey b. ( ) el-bevvâb ve gayruhüm.