Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 340 Hüküm no: 296 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Halîfe Vakfı’ndan İstanbul’da Çelebioğlu mahallesinde bulunan evin Salamon ve Lazar ve Yasef isimli Yahudilere 90 yıllığına kiralandığı Haremeyn-i Muhteremeyn Evkāfı nâzırı olup atebe-i aliyye-i sultâniyyede hâlâ Dârüssaâdeti’ş-şerîfe ağası olan kıdvetü’l-havâs ve’l-mukarrebîn İsmail Ağa b. Abdulmuin hazretleri taraf-ı karînü’ş-şereflerinden îcâr-ı âti’z-zikre vekîl olup hasm-ı câhid mahzarında vekâleti sâbite olan fahrü’l-a‘yân Muhâsib Ahmed Efendi bin Mehmed meclis-i şer‘-i hatîr-i lâzımü’t-tevkīrde ashâb-ı hâze’l-kitâb Salamon ve Lazar ve Yasef evlâd-ı Yako nâm Yahudi muvâcehelerinde bi’l-vekâle ikrâr-ı tâm ve takrîr-i kelâm edip müvekkil-i mûmâ-ileyh hazretleri Dârüssaâde ağalarından olup vefât eden merhûm Abbas Halîfe hâl-i sıhhatinde icâresi her sene fukarâ-i Haremeyn’e irsâl olunmak için akār iştirâsını şart ve ta‘yîn ettiği nükūd-ı mevkūfesiyle mezbûrûn Yahudiler bundan akdem üç yüz altmış bin akçeye Evkāf-ı haremeyn’e mülhak olmak üzere iştirâ edip mahmiye-i İstanbul’da Çelebioğlu mahallesinde vâki‘ fevkānî ve tahtânî on beş bâb odalı ve iki matbah ve iki mahzen ve bir zîr-i zemîn ve iki bi’r-i mâ ve kenîf ve cüneyneyi müştemil bir tarafı merhûm Ömer Ağa Vakfı ve bir tarafı Hayim mülkü ve iki tarafı tarîk-i âm ile mahdûd olup tûlen ve arzen hesâb-ı şatrancî üzere bin on dört zirâ‘ arsasının ve yine mahrûse-i Üsküdar’da merhûm Gülfam Hatun Vakfı’na bin seksen akçe mukāta‘ası olan menzili ba‘de’t-tahliyye ve’t-tekābuz mukāta‘a-i merkūmesini ve meremmet-i lâzımesi kendi mâlından edip mâh be-mâh icâre-i yevmiyyesini vâkıf-ı merkūm Abbas Halîfe Vakfı’na edâ etmek üzere târîh-i kitâb şehri gurresinden doksan yıl tamâmına varınca her üç yılda bir akd-i cedîd olup akd-i evvelin intihâsı akd-i sâninin ibtidâsı olmak üzere tecdîd-i akde muhtâc olmaksızın icâre-i tavîleyi tecvîz eden fukehâ-yı zevi’l-elbâb kavilleri üzere icâre-i tavîle-i mu‘tâde ile beher sene yirmi iki bin akçe icâre-i müeccele ile mezbûrûn Salamon ve Lazar ve Yasef Yahudilere iştirâken müvekkilim nâzır-ı müşârun-ileyh tarafından vekâleten îcâr ve teslîm eyledim onlar dahi vech-i muharrer üzere istîcâr ve kabûl eylediler. Ba‘de’l-yevm müddet-i merkūme tamâmına değin yevmî altmış birer akçe hesâbınca bin sekiz yüz beş akçe icâre-i müeccelesini mâh be-mâh cânib-i vakfa edâ edip emsâli gibi iştirâken mutasarrıf olsunlar dedikde gıbbe’t-tasdîki’ş-şer‘î menzil-i merkūmun mecmû‘-ı ücretine mahalle-i merkūme sükkânından ...? v. Avraham ve Yako v. Pohtan ve müste’cirlerden her biri âharın zimmetine lâzım gelen ücrete emr ve kabûlü hâvî kefâletle kefîl olduklarından sonra vech-i muharrer üzere îcâr min-külli vech vakfa evlâ ve enfa‘dır deyu sikātdan cemm-i gafîr haber vermeğin mâ-hüve’l-vâkı‘ bi’t-taleb ketb olundu. Fî-evâsıtı Recebi’l-esam li-sene ihdâ ve selâsîn ve elf. Şühûdü’l-hâl: es-Sâbıkūn.