Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 341 Hüküm no: 297 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Halife Vakfı’ndan İstanbul’da Sarıcapaşa mahallesinde bulunan evin İlya v. Hevda isimli Yahudiye 90 yıllığına kiralandığı Haremeyn-i Muhteremeyn Evkāfı nâzırı olup atebe-i aliyye-i sultâniyyede hâlâ Dârüssaâdeti’ş-şerîfe ağası olan iftihârü’l-havâs ve’l-mukarrebîn İsmail Ağa b. Abdulmuin hazretleri taraf-ı karînü’ş-şereflerinden îcâr-ı âti’z-zikre vekîl olup hasm-ı câhid mahzarında nehc-i mu‘teber üzere şer‘an vekâleti sâbite olan fahrü’l-a‘yân Muhâsib Ahmed Efendi bin Mehmed meclis-i şer‘-i hatîr-i lâzımü’t-tevkīrde sâhibü hâze’l-kitâb İlya v. Hevda nâm Yahudi muvâcehesinde bi’l-vekâle ikrâr-ı tâm ve takrîr-i kelâm edip müvekkilim nâzır-ı müşârun-ileyh hazretleri Dârüssaâde ağalarından olup vefât eden merhûm Abbas Halîfe hâl-i sıhhatinde icâre-i müeccelesi her sene fukarâ-i Haremeyn’e irsâl olunmağiçin akār iştirâsını şart ve ta‘yîn ettiği nükūd-ı mevkūfesiyle mezbûr İlya’dan ve şerîki olan Hevda v. Menahim nâm Yahudilerden bundan akdem üç yüz on bin akçeye Evkāf-ı haremeyne mülhak olmak üzere iştirâ edip mahmiye-i İstanbul’da Sarıca Paşa mahallesinde vâki‘ fevkānî ve tahtânî on dört bâb odayı müştemil tûlen ve arzen hesâb-ı şatrancî üzere üç yüz on beş zirâ‘ arsası olup bir tarafı Kethüdâ ( ) Hatun Vakfı ve bir tarafı Sâhire bt. Mordehay ve bir tarafı tarîk-i hâs ve bir tarafı tarîk-i âm ile mahdûd olan menzili meremmet-i lâzımesini kendi mâlından edip mâh be-mâh icâre-i yevmiyyesini merhûm-ı müşârun-ileyh Abbas Halîfe vakfına edâ etmek üzere târîh-i kitâb şehri gurresinden doksan yıl tamâmına varınca her üç yılda bir akd-i cedîd olup akd-i evvelin intihâsı akd-i sâninin ibtidâsı olmak üzere tecdîd-i akde muhtâc olmaksızın icâre-i tavîleyi tecvîz eden fukahâ-yı zevi’l-elbâb kavilleri üzere icâre-i tavîle-i mu‘tâde ile beher sene on sekiz bin akçe icâre-i müeccele ile merkūm İlya’ya vekâleten îcâr eyledim [90b] vekâleten îcâr ve teslîm eyledim, ol dahi istîcâr ve kabûl eyledi. Ba‘de’l-yevm müddet-i merkūme tamâmına değin yevmî ellişer akçe hesâbınca beher şehri <> bin beş yüz akçe icâre-i müeccelesini mâh be-mâh cânib-i vakfa edâ edip emsâli gibi mutasarrıf olsun dedikde gıbbe’t-tasdîki’ş-şer‘î mahalle-i merkūmede sâkin Menahim v. Lazar nâm Yahudi menzil-i merkūmun ücret-i müeccele-i merkūmesine emr ve kabûlü hâvî kefâletle kefîl oldukdan sonra vech-i muharrer üzere îcâr vakfa min-külli vech evlâ ve enfa‘dır deyu sikātdan cemm-i gafîr haber vermeğin mâ-vaka‘a bi’t-taleb ketb olundu. Fî-evâsıtı Recebi’l-ferd li-sene ihdâ ve selâsîn ve elf. Şühûdü’l-hâl: es-Sâbıkūn.