Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 341 Hüküm no: 298 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Halîfe Vakfı’ndan İstanbul’da Hubyar mahallesinde bulunan evin Saye v. Sabetay isimli Yahudiye 90 yıllığına kiralandığı Haremeyn-i Muhteremeyn Evkāfı nâzırı olup atebe-i aliyye-i sultâniyyede hâlâ Dârüssaâdeti’ş-şerîfe ağası olan iftihârü’l-havâs ve’l-mukarrebîn İsmail Ağa b. Abdulmuin hazretleri taraf-ı pür şereflerinden îcâr-ı âti’z-zikre vekîl olup hasm-ı câhid mahzarında nehc-i mu‘teber üzere vekâleti sâbite olan fahrü’l-a‘yân Muhâsib Ahmed Efendi bin Mehmed meclis-i şer‘de sâhibü hâze’l-kitâb Saye v. Sabetay nâm Yahudi muvâcehesinde bi’l-vekâle ikrâr-ı tâm ve takrîr-i kelâm edip müvekkil-i nâzır-ı müşârun ileyh hazretleri Dârüssaâde ağalarından olup vefât eden merhûm Abbas Halîfe’nin hâl-i sıhhatinde icâresi her sene fukarâ-i Haremeyn’e irsâl olunmağiçin akār iştirâsını şart ve ta‘yîn ettiği nükūd-ı mevkūfesiyle mezbûr Saye’den bundan akdem iki yüz altmış bin akçeye Evkāf-ı Haremeyn’e mülhak olmak üzere iştirâ edip mahmiye-i İstanbul’da Hubyar mahallesinde vâki‘ fevkānî ve tahtânî on <> bir bâb odayı ve iki matbah ve bir bodrum ve fırın ve bi’r-i mâyı müştemil bir tarafı Karekarayi mülkü ve iki tarafı Kasım Paşa Vakfı ve bir tarafı tarîk-i âm ile mahdûd olup tûlen yirmi dört ve arzen on iki buçuk be-hesâb-ı şatrancî iki yüz doksan zirâ‘ arsasının her sene mahrûse-i Galata’da câmi‘-i şerîfi olan merhûm Kasım Paşa Vakfı’na bin seksen akçe mukāta‘ası olan menzili ba‘de’t-tahliyye ve’t-tekābuz mukāta‘a-i merkūme ve meremmet-i lâzımesin kendi mâlından edip mâh be-mâh icâre-i yevmiyesi merhûm-ı müşârun-ileyh Abbas Halîfe Vakfı’na edâ etmek üzere târîh-i kitâb şehri gurresinden doksan yıl tamâmına varınca her üç yılda bir akd-i cedîd olup akd-i evvelin intihâsı akd-i sâninin ibtidâsı olmak üzere tecdîd-i akde muhtâc olmaksızın icâre-i tavîleyi tecvîz eden fukahâ-yı zevi’l-elbâb kavilleri üzere icâre-i tavîle-i mu‘tâde ile beher sene on altı bin akçe icâre-i müeccele ile mezbûr Saye’ye müvekkilim nâzır-ı müşârun-ileyh tarafından vekâleten îcâr ve teslîm eyledim ol dahi vech-i muharrer üzere istîcâr ve kabûl eyledi. Ba‘de’l-yevm müddet-i merkūme tamâmına değin yevmî kırk dört buçuk akçe hesâbınca beher şehri bin üç yüz otuz beş akçe icâre-i müeccelesini cânib-i vakfa edâ edip emsâli gibi mutasarrıf olsun dedikde gıbbe’t-tasdîki’ş-şer‘î menzil-i merkūmun mecmû‘ ücret-i müeccelesine mahalle-i merkūm sükkânından Yahuda v. Salasin ve Yehyâ v. İlya nâm Yahudiler emr ve kabûlü hâvî kefâletle kefîl oldukdan sonra vech-i muharrer üzere îcâr min-külli vech vakfa evlâ ve enfa‘dır deyu sikātdan cemm-i gafîr haber vermeğin mâ-hüve’l-vâkı‘ bi’t-taleb ketb olundu. Fî-evâsıtı Recebi’l-ferd li-sene ihdâ ve selâsîn ve elf el-hicriyye. Şühûdü’l-hâl: es-Sâbıkūn.