Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 342 Hüküm no: 299 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabık Kağıd Emini Rıdvan Ağa’nın Ortaköy’de bulunan vakıf evin tamiri için yaptığı masrafın tespiti Bâ‘isü hâze’l-kitâb sâbıkā kağıd emîni olan kıdvetü’l-a‘yân Dergâh-ı âlî müteferrikalarından el-Hâc Rıdvan Ağa b. İskender meclis-i şer‘-i şerîfde bi’l-fi‘il Medîne-i Münevvere -sallallâhu te‘âlâ alâ-münevvirihâ- Evkāf-ı şerîfesi mütevellîsi olan fahrü’l-akrân Dergâh-ı âlî bevvâblarından Veli Bey b. Abdülmennan mahzarında takrîr-i kelâm kılıp mahmiye-i Galata’ya tâbi‘ Ortaköy demekle ma‘rûf karyede vâki‘ şarkan merhûm Derviş Ağa eytâmı mülkleri ve şimâlen evkāf-ı merkūme bağı ve garben Mustafa Ağa b. İskender Medîne-i Münevvere fukarâsına vakfettiği hadîka ve kıbleten sâhil-i bahr ile mahdûd olup merhûm Kejdehân Ali Paşa vakfı ve icâresini fukarâ-i mezkûreye şart ettiği hadîka yüz bin akçe icâre-i mu‘accele ve yevmî on akçe icâre-i müeccele ile benim tasarrufumda olup müşrifü ile’l-harâb olan mevâzi‘ini tecdîd lâzım geldikde binâya sarf olunacak meblağ icâre-i mu‘acceleye mahsûb olmak üzere evkāf-ı mezbûre mütevellîsi iziniyle ihdâs ettiği ebniyeye kendi mâlımdan iki yüz otuz bin beş yüz doksan beş akçe sarfeyledim. Kıbel-i şer‘-i şerîfden üzerine varılıp tahammülü keşf ve tahrîr olunmak matlûbumdur demeğin savb-ı şer‘-i şerîfden Hâssa mi‘mârlardan Üstâd Ali b. Halil ile ve ehl-i vukūfdan zeyl-i kitâbda mastûretü’l-esâmî olan bî-garaz Müslimîn ile üzerine varılıp nazar olundukda müşârun-ileyh Rıdvan Ağa müceddeden binâ ettiği mevâzi‘in harcı ale’l-infirâd takdîr ve takvîm olundukda bin yedi yüz yedi zirâ‘ bennâ’î taş duvarına altmış sekiz bin iki yüz seksen akçe ve iki yüz zirâ‘ döşeme tuğlaya üç bin sekiz yüz yirmi beş akçe ve üç kıt‘a pencere kapaklarına ve iki kıt‘a pencerenin billûr camlarına dokuz yüz akçe ve yüz doksan bir zirâ‘ dolma duvara beş bin yedi yüz otuz akçe ve seksene bir zirâ‘ sathına üç bin iki yüz kırk akçe ve yüz doksan iki zirâ‘ safına on bin beş yüz yirmi akçe ve cânib-i şark ve cânib-i garbdan havâle def‘ine tahta perdesine dokuz yüz akçe ve iki yüz on zirâ‘ bahçe trabuzanına sekiz bin dört yüz akçe ve selâmlık önünde vâki‘ olan tahta-pûş-ı kebîr tahtalarına yedi bin sekiz yüz akçe ve kafeslerine altı bin akçe ve iki kat asma çardaklarına ve direklerine otuz beş bin akçe ve selâmlığını inhidâmından tahlîs için kayıkhâne dolmasına ve direklerine ve desteklerine yirmi bin akçe ve hamâmın harâb olan künk suyollarına seksen tahta kurşununa ve lökününe ve kettânına ve revgan-ı bezîre otuz bin akçe ve şâdırvân önünde döşemesine ve sofa ve şâdırvânına ve râh-ı âbına on beş bin akçe ve sâir mismâr ve harc-ı zevâyidine ve bi’l-cümle üstâdiyye ve ırgadiyesine on dört bin akçe mi‘mâr-ı mezbûr ve ehl-i vukūf-ı mezkûrûn cem‘an iki yüz otuz bin beş yüz doksan beş akçe tahmîn edip sâlifü’z-zikr ebniyenin meblağ-ı merkūm iki yüz otuz bin beş yüz doksan beş akçe masrafına tahammülü vardır noksân ile olmak ihtimâli yokdur deyu mütevellî-i mezkûr Veli Bey muvâcehesinde tahmîn-i sahîh ile tahmîn edip minvâl-i muharrer üzere olan tahmînde cümlesi ittifâk dahi ettiklerinde mâ-hüve’l-vâkı‘ mahallinde bi’t-taleb tahrîr ve ketb olundu. Fi’l-yevmi’l-hâmis ve’l-ışrîn min-Recebi’l-mürecceb li-sene ihdâ ve selâsîn ve elf. Şühûdü’l-hâl: Mustafa Ağa b. İskender Mütevellî-i Şâhzâde, Mustafa Çelebi b. Mehmed el-kâtib, İsmail Bey b. Mahmud el-bevvâbü’s-sultânî, Mehmed Bey b. Mustafa el-bevvâbü’s-sultânî, Piyale b. Abdullah, Hasan b. Abdullah Râh-ı âbî, Ali Bey b. Abdullah el-bevvâbü’s-sultânî, kâtibü’l-hurûf Ca‘fer Efendi b. eş-Şeyh Behram, Mehmed Çelebi b. Mehmed Tâbi‘-i hazret-i efendi, Selim b. Abdullah ve gayruhüm.