Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 346 Hüküm no: 302 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İsmail Çelebi’nin varissiz vefat eden Darüssade Ağası Abbas Halîfe’den aldığı borcu Haremeyn Vakfı’na ödediği Atebe-i aliyye’de bi’l-fi‘il Dârüssaâde ağası olup Haremeyn-i Muhteremeyn Evkāfı nâzırı olan sâhibü’l-izzi ve’t-temkîn İsmail Ağa b. Abdulmuin meclis-i şer‘-i şerîfde sâhibü hâze’l-kitâb mahmiye-i Kostantıniyye mahallâtından Unkapanı kurbünde merhûm Salih Paşa mahallesi sâkinlerinden fahrü’t-tüccâr el-Hâc İsmail Çelebi b. Ebubekir mahzarında ikrâr ve takrîr-i kelâm kılıp bundan akdem Dârüssaâde ağalarından olan Abbas Halîfe nâm kimesne müşârun-ileyh el-Hâc İsmail Çelebi’ye iki yüz kırk bin akçe ikrâz edip ol dahi meblağ-ı merkūmu iktirâz ettikden sonra mezkûr Abbas Halîfe vefât edip zâhirde vâris-i ma‘rûfu olmamağla mevcûd olan muhallefâtı cânib-i saltanatdan ahz u kabz olunup hâlâ meblağ-ı merkūmu ben dahi nezâretim hasebiyle ahz u kabz etmek lâzım geldikde mûmâ ileyh el-Hâc İsmail Çelebi meblağ-ı merkūm iki yüz kırk bin akçe asl-ı mâlı ve fâide nâmına olan kırk sekiz bin akçeyi dahi cem‘an iki yüz seksen sekiz bin akçeyi bana teslîm edip ben dahi mecmû‘-ı meblağeyn-i mezbûreyni nezâret-i mahkiyyem hasebiyle onun yedinden bi’t-tamâm ahz u kabz ettim. Ba‘de’l-yevm müteveffâ-yı mezbûr Abbas Halîfe’nin mâlından mûmâ-ileyh el-Hâc İsmail Çelebi zimmetinde bir akçe ve bir habbe bâkī kalmadı ve merhûm Abbas Halîfe meblağ-ı merkūm iki yüz kırk bin akçeyi mezkûr el-Hâc İsmail Çelebi ikrâz ettikde ikrâz ettiğine mezbûr el-Hâc İsmail Çelebi’nin hatt u hatemini müştemil tezkiresini ahz ve hıfz edip hîn-i vefâtında tezkire-i mezbûre zuhûr etmeyip ba‘de zâlike zuhûr ederse ona i‘tibâr olunmayıp şak oluna dedikde gıbbe’t-tasdîk mâ-vaka‘a kayd şud. Fi’l-yevmi’s-sâdis min-Şa‘bân li-sene ihdâ ve selâsîn ve elf. Şühûdü’l-hâl: Ali Ağa b. Mehmed ez-zevvâkü’s-sultânî, Mustafa b. Sefer el-bevvâbü’s-sultânî, İsmail b. Bâli, Mehmed Ağa b. Abdülmennan, Süleyman Ağa b. Abdüddâim, Yusuf Beşe b. Hasan, Hızır b. İbrahim, Muzaffer b. Mehmed Ağa, el-Hâc Ramazan b. Abdullah et-teberdâr, Süleyman b. Hüseyin, İshak Efendi, Mehmed b. Bâli, el-Hâc Ebubekir b. Hasan Teberdâr ve gayruhüm.