Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 350 Hüküm no: 304 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan Ağa b. İskender’in Ortaköy’de bulunan vakıf bahçenin tamiri için yaptığı masraftan dolayı vakıf mütevellisinin verdiği temessük Haremeyn-i Muhteremeyn Evkāfı’na bi’l-fi‘il mütevellî olan fahrü’l-emâsil ve’l-eşbâh Veli Bey b. Abdullah nâm bevvâb-ı sultânî meclis-i şer‘-i şerîfde sâhibü hâze’l-kitâb kıdvetü’l-e‘âzım ve’l-a‘yân Rıdvan Ağa b. ( ) mahzarında ikrâr ve takrîr-i kelâm kılıp evkāf-ı mezbûreden mahmiye-i Galata’ya tâbi‘ Ortatöy demekle ma‘rûf karyede vâki‘ şarkan merhûm Derviş Ağa eytâmı mülkleri ve şimâlen evkāf-ı mezbûre bağı ve garben Mustafa Ağa b. İskender vakfedip icâresini Medîne-i Münevvere fukarâsına şart ettiği menzil ile kıbleten sâhil-i bahr ile mahdûd olup merhûm Kejdehân Ali Paşa vakf ve icâresini Medîne-i Münevvere fukarâsına şart ettiği hadîka yüz bin akçe icâre-i mu‘accele ve yevmî on akçe icâre-i müeccele [ile] müşârun-ileyh Rıdvan Ağa’nın taht-ı tasarrufunda olup mutasarrıf iken mürûr-ı eyyâm ile hadîka-i mezbûre harâba müşrif olup bazı mevâzi‘i münhedime olup ve bazı mevâzi‘i meremmete muhtâce olup mûmâ-ileyh Rıdvan Ağa dahi münhedime olan mevâzi‘i müceddeden kendi mâlından icâre-i mu‘accelesine mahsûb olmak üzere binâya ve meremmâta muhtâc olan mevâzi‘i meremmete mütevellî-i vakfdan izin alıp binâya ve meremmete me’zûn oldukdan sonra cedîd ebniyeye muhtâc olan mevâzi‘de müceddeden binâ ihdâs edip ve meremmâta muhtâc olan mevâzi‘i dahi meremmet edip tahammülü keşf ve tahmîn olundukda hadîka-i mezbûrede vâki‘ ebniyesi ve meremmeti cümle iki yüz otuz dokuz bin beş yüz doksan beş akçe harc ve masrafı olduğu bulunup bunun üzerine ittifâk olundukdan sonra mûmâ-ileyh Rıdvan ağa def‘a-i sâniyede dahi cânib-i vakf-ı mezbûra elli bin akçe icâre-i mu‘accele verip bu ana gelince nükūd ve binâ ve meremmet ile cânib-i vakfa sebk eden icâre-i mu‘accelesi bir birine zam olunup mecmû‘u hesâb ve kitâb olundukda cümle üç yüz seksen bin beş yüz doksan beş akçe hadîka-i mezbûre için cânib-i vakf-ı mezbûra sebk ettiği mukarrer olup meblağ-ı merkūm üç yüz seksen bin beş yüz doksan beş akçe icâre-i mu‘accelesi cânib-i vakfa sebk ettiğine benden temessük dahi taleb etmeğin imzâm ile mümzâ ve hatemim ile mahtûm hâlâ yedine temessük dahi def‘ eyledim vakt-i hâcetde ibrâz ede dedikde mütevellî-i mezbûru kelimât-ı meşrûhasında müşârun-ileyh Rıdvan Ağa vicâhen tasdîk edicek mâ-hüve’l-vâkı‘ bi’t-taleb ketb olundu. Fî-evâili Şa‘bâni’l-mu‘azzam li-sene ihdâ ve selâsîn ve elf. Şühûdü’l-hâl: Fahrü’l-akrân Mustafa Çelebi b. İskender, Ali Bey b. Abdullah el-bevvâbü’s-sultânî, Fethullah Çelebi b. Yahya el-bevvâb, Mustafa Çelebi b. Mehmed el-kâtib, İsmail b. Mahmud el-bevvâbü’s-sultânî, Mehmed Bey b. Mustafa el-bevvâbü’s-sultânî ve gayruhüm.