Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 352 Hüküm no: 306 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa Filyos mahallesinde bulunan vakıf evin tamirini yaptıran Haremeyn mütevellisi Hızır Çavuş b. Mehmed’in yaptığı masrafın tespiti Mahrûse-i Bursa’da vâki‘ Haremeyn-i Muhteremeyn Evkāfı’nın bi’l-fi‘il mütevellîsi olan fahrü’l-akrân Hızır Çavuş b. Mehmed nâm kimesne meclis-i şer‘-i hatîre gelip takrîr-i kelâm edip vakf-ı mezbûrdan mahrûse-i merkūme kal‘asında Filyos mahallesinde vâki‘ olup fevkānî ve tahtânî büyût-ı müte‘addideyi ve hâneye mâ’-i câriyi ve eşcâr-ı müsmireyi hâviye muhavvatayı müştemil olup bir tarafı Receb Efendi b. Nasuh mülkü ve bir tarafı Şeyh Mehmed Efendi mülkü ve iki tarafı tarîk-i âm ile mahdûd olan menzil bundan akdem harâba müşrif olup ta‘mîrine vakfın hâzır mâlı olmamağla vakf-ı merkūmun sâbıkā mütevellîsi olan Mahmud Bey nâm kimesne menzil-i merkūmu bana icâre-i mu‘accele ile îcâr edip tecdîd ve ta‘mîrine izin verip ben dahi izn-i mütevellî ve ma‘rifet-i hâkimü’ş-şer‘ ile menzil-i merkūmun hâricinde vâki‘ olan çardakın bir bütün duvarı ile bir nısf duvarından mâ‘adâsı müceddeden binâ edip ve zikr olunan çardakın tarafeyninde vâki‘ olan iki beyt-i ulvînin dahi sakflarının ekserini ve kapılarını ve nerdübânlarını ve yüklük ve ocaklarını ve bazı pencerelerini ve dâhilinde vâki‘ olan üç beyt-i süflînin ekser mevâzi‘ini tecdîd ve meremmet edip ve menzil-i merkūmun hâricinde ve dâhilinde vâki‘ olan kenîflerini dahi tecdîd ve meremmet edip yirmi binden ziyâde akçe harc u sarf eyledim, kıbel-i şer‘den üzerine varılıp tahammülü keşf ve tahmîn olunmak taleb ederin dedikde cânib-i şer‘den Mevlânâ es-Seyyid Nimetullah irsâl olunup ol dahi Hâssâ mi‘mârlardan Üstâd Ebubekir b. Süleyman ile ve zeyl-i kitâbda mastûretü’l-esâmî olan bî-garaz ehl-i vukūf Müslimîn varıp mu‘âyene ettiklerinde fi’l-vâki‘ menzil-i mezbûr vech-i muharrer üzere tecdîd ve meremmet olunduğu mukarrer olup mesâha ettiklerinde zikr olunan çardakın cânib-i şarkîsinde vâki‘ olan duvarın müceddeden binâ olunan nısfı bennâ zirâ‘ıyla tûlen on beş ve arzen dört zirâ‘ olup hesâb-ı şatrancî üzere altmış zirâ‘ olup mu‘tâd üzere her zirâ‘ına yirmişer akçeden bin iki yüz akçe ve cânib-i garbîsinde vâki‘ olup temelinden binâ olunan duvar dahi tûlen on bir ve arzen sekiz be-hesâb-ı şatrancî seksen zirâ‘ olup her zirâ‘a yirmişer akçeden bin yedi yüz akçe ve cânib-i kıblîsinde olan duvarın dahi kezâlik tûlen ve arzen seksen zirâ‘ olup yirmişer akçeden bin yedi yüz altmış akçe olup ve zikr olunan duvarlarda olan altı aded pencerenin demirlerine cümle harcıyla ikişer yüz akçeden bin iki yüz akçe ve iki dolaba dahi ikişer yüz akçeden dört yüz akçe ve zikr olunan çardakın sakfı tûlen yirmi iki zirâ‘ ve arzen dokuz zirâ‘ olup hesâb-ı mezkûr üzere yüz doksan sekiz zirâ‘ olup her zirâ‘a yirmişer akçeden dört bin dokuz yüz kırk akçe ve sathı dahi tûlen on iki ve arzen altı be-hesâb-ı şatrancî yetmiş zirâ‘ olup yirmişer akçeden sekiz yüz akçe ve iki trabuzanına beş yüz akçe ve zikr olunan çardakın tarafeyninde olan iki beyt-i ulvînin sakfının tecdîd olunan yerleri tûlen altışar zirâ‘ ve arzen beşer zira‘ be-hesâb-ı şatrancî altmış zirâ‘ olup yirmi beşer akçeden bin beş yüz akçe cânib-i kıblîsinde olan odanın kapısı ve yüklük ve ocak dabılbaz ve döşemesi ve iki pencere ve bir cânibine cem‘an bin yüz akçe ve bir sokak kapısı ile çardak nerdübânına ve su küpüne ve taşrada iki sakfın meremmetine bin ki yüz akçe ve dört zirâ‘ tûlu ve üç zirâ‘ arzı olup hesâb-ı mezbûr üzere on iki zirâ‘ sakfının dahi yirmibeşer akçeden dahi iki yüz kırk akçe ve kapısına üç yüz akçe ve menzil-i merkūmun dâhilinde vâki‘ olup içinde otluk olan beyt-i süflînin dahi meremmet olunan mevâzi‘ine ve menzil-i merkūmun dâhilinde vâki‘ olan bahçe kapısına beş yüz akçe bu cümlenin üstâdiyye ve ırgadiyesine dahi beş bin üç yüz otuz cem‘an yirmi iki bin <> dokuz yüz akçeye tahammülü üzere ittifâkları kayd olundu. Şa‘bân li-sene 1031 [Şühûdü’l-hâl:] Abdurrahman Çavuş, el-Hâc Abdi b. el-Hâc Mustafa, Mustafa b. Ali, Mehmed Bey b. Mehmed el-cündî, Mustafa Çelebi b. Muharrem, Mustafa b. Abdünnebî, Mehmed b. Ali.