Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 357 Hüküm no: 309 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan Mimar Kemal mahallesinde bulunan evin Hüseyin Ağa b. Abdülmennan’a kiralandığı Haremeyn-i Şerîfeyn Evkāfı’na hâlâ mütevellî olan fahrü’l-akrân Hüseyin Ağa bin Memi meclis-i şer‘-i şerîfde diğer Hüseyin Ağa b. Abdülmennan muvâcehesinde takrîr-i kelâm edip evkāf-ı mezbûreden Mi‘mâr Kemal mahallesinde bir tarafı Kazzâzbaşı menzili ve bir tarafı Hüseyin Paşa odaları ve bir tarafı tarîk-i âm ve bir tarafı buzhâne ile mahdûd olup dâhiliyyesi iki beyt-i ulvî ve bir sofa ve hadîka ve kenîf ve su kuyusunu müştemil ve hâriciyyesi bir ahırı ve bir odayı hâvî olan menzili ber-mûceb-i şart-ı vâkıf vakf-ı şerîfe âid oldukda kırk bin akçe icâre-i mu‘accele ve yevmî altı akçe icâre-i müeccele ile mezbûr Hüseyin Ağa’ya târîh-i kitâb gününden îcâr edip ol dahi istîcâr ve kabûl edip meblağ-ı mezbûr kırk bin [akçeyi] yedinden vakıf için ahz ve kabz edip mâdâm ki cânib-i vakfa yevmî altı [akçe] icâresin mâh be-mâh edâ eyleye keyfe mâ yeşâ menzil-i mezbûra mutasarrıf ola dedikde mukırr-ı mezbûru ikrâr-ı meşrûhunda mukarrun leh merkūm dahi bi’l-müvâcehe tasdîk ettikde mâ-vaka‘a bi’t-taleb kayd olundu. Fi’l-yevmi’l-ışrîn min-şehri Zilhicce sene ihdâ ve selâsîn ve elf. Şühûdü’l-hâl: Ali Bey b. ( ) el-bevvâb, Mustafa Çelebi b. ( ) el-kâtib, Muslu Çelebi b. el-Hâc Kasım, Süleyman b. Abdullah, Abdurrahman b. İbrahim ve gayruhüm.