Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 358 Hüküm no: 310 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. İshak tarafından vakfedilen Üsküdar Yenimahalle’de bulunan evin vakfiyesi Mahrûse-i Üsküdar’da vâki‘ Vâlide Sultan Evkāfı’na bi’l-fi‘il mütevellî olan fahrü’l-akr[ân] Hüseyin Ağa b. Ali meclis-i şer‘de takrîr-i kelâm edip mahrûse-i mezbûrede Yeni mahallede vâki‘ bir tarafı el-Hâc Ali b. Abdülgani ve bir cânibi Ali Bâli b. Süleyman ve bir cânibi İnâyet bt Abdullah ve bir cânibi Şem‘î Hatun bt. <> Ahmed Dede ve bir tarafı tarîk-i âm ile mahdûd menzilin mâliki Mahmud Ağa b. İshak nâm kimesne menzil-i mezbûru evvelâ kendi nefsine ba‘dehû evlâdına ve evlâd-ı evlâdına ba‘de’l-inkırâz zevcesi Rıdvan bt. Abdullah nâm hatuna ba‘dehüm evlâdına ve evlâd-ı evlâdına ba‘de’l-inkırâz Medîne-i Münevvere fukarâsına vakf ve şart edip hâlâ mezbûrlar bi’l-cümle münkarız olup müstahık kimesne kalmamak ile menzil-i mezbûr cânib-i vakfa âid oldukda hâlâ Evkāf-ı haremeyn mütevellîsi olan Hüseyin Ağa b. Memi menzil-i mezbûru ba‘de inkıtâ‘ı ragabâti’n-nâs yirmi bin akçe icâre-i mu‘accele ve yevmî iki akçe icâre-i müeccele îcâr edip yedime hatt ü hattını [hatemini] müştemil ve bin otuz iki Muharremi gurresiyle müverrah temessük verip mûcebince kıbel-i şer‘den dahi hüccet taleb ederin dedikde ba‘de’n-nazar her vechile takrîr-i tahrîrine muvâfık bulunmağın mûcebince kıbel-i şer‘den dahi işbu hurûf tahrîr olunup yedine def‘ olundu. Fî-gurreti Muharrem sene isnâ ve selâsîn ve elf. Şühûdü’l-hâl: İbrahim Efendi el-kassâm, Hüseyin Çelebi b. Halil, Halil Bey b. Abdullah, Kasım Bey b. Abdullah el-bevvâb. Ahmed Çelebi b. Davud, Üstâd Ali b. ( ) el-mi‘mâr, Veli Bey b. Mahmud, Ahmed Beşe b. Abdullah, Mehmed Reis b. Abdullah, el-Hâc Ömer el-cündî.