Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 366 Hüküm no: 315 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abide bt. Abdullah’ın kiraladığı vakıf ev için temessük talep ettiği Mahrûse-i Kostantıniyye mahallâtından Emir Buharî kurbünde Hoca Üveys mahallesi sâkinelerinden sâhibet-i hâze’l-kitâb Âbide bt. Abdullah meclis-i şer‘-i şerîfde takrîr-i kelâm edip Haremeyn-i Şerîfeyn Evkāfı’ndan mahalle-i mezbûrede vâki‘ bir tarafı mahalle-i mezbûre imâmına meşrûta menzil ile ve bir tarafı Dilaram Hatun vakfı ile ve iki tarafı tarîk-i âm [ile] mahdûd olup dâhiliyyesi bir bâb tahtânî odayı ve sofayı ve altında mahzeni ve mahtabı ve kenîfi ve hâriciyyesi bir ahırı ve iki bâb fevkānî odaları ve onun üstünde bir bâb nâ-tamâm selâmlığı ve sofayı müştemil olan menzilin mu‘accele ve müeccele ile müste’ciri olan zevcim Semercizâde demekle ma‘rûf İsmail Subaşı b. Hüseyin bilâ-veled fevt olup menzil-i mezbûr vakf-ı şerîfe âid oldukda hâlâ evkāf-ı mezbûre mütevellîsi yediyle âhara îcâr için beyne’t-tâlibîn arz ve müzâyede olunup kırk bin akçe icâre-i mu‘accele ve yevmî iki akçe icâre-i müeccele ile menzil-i mezbûr benim üzerimde karâr edip tâlib-i âhar zuhûr etmeyicek mütevellî-i mezbûr menzil-i merkūmu vech-i meşrûh üzere bana îcâr ve teslîm ben dahi istîcâr ve kabûl edip meblağ-ı mezbûr kırk bin akçeyi vakıf için yedimden ahz u kabz ettikden sonra yedime kendi imzâsıyla mümzât ve hatemi ile mahtûme ve târîh-i kitâb şehri gurresiyle müverraha tezkire-i ma‘mûlün-bihâ verip mûcebince kıbel-i şer‘den dahi temessük taleb ederin deyu tezkire-i mezbûreyi ibrâz edip nazar olundukda her vechile mezbûre Âbide Hatun’un takrîri tahrîr-i tezkireye muvâfık ve mutâbık bulunmağın mûcebince kıbel-i şer‘den dahi işbu hurûf li-ecli’t-temessük ketb ve imlâ olunup tâlibe-i mezbûrenin yedine def‘ ve i‘tâ olundu. Tahrîren fî-evâhiri şehri Rebî‘i’l-evvel min-şühûri sene isneyn ve selâsîn ve elf. Şühûdü’l-hâl: Ramazan Efendi b. Ahmed el-imâm, Mustafa Efendi b. Abdülmennan el-imâm, Mehmed Efendi b. Muharrem, el-Hâc Mehmed b. Abdullah, Süleyman Halîfe el-müezzin, Keyvan b. Abdullah, Murad b. Mehmed er-râcil, İsmail b. İsrail, Hasan b. İbrahim, el-Hâc Mustafa b. Mehmed.