Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 367 Hüküm no: 316 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Valide Sultan Evkafı mütevelisi Hüseyin Ağa’nın kiracısı olduğu evin tamiri için ne kadar masraf yaptığının tespiti Sâbıkā mahrûse-i Üsküdar’da merhûme Vâlide Sultan Evkāfı mütevellîsi olan umdetü’l emâcid Hüseyin Ağa b. Ali Bey meclis-i şer‘-i şerîfde takrîr-i kelâm ve ta‘bîr ani’l-merâm edip Haremeyn-i Şerîfeyn Evkāfı’ndan mahrûse-i mezbûrede Yeni mahallede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât olup hâlâ Haremeyn-i Şerîfeyn mütevellîsi olan fahrü’l-akrân Hüseyin Ağa’dan mu‘accele ve müeccele ile bundan akdem istîcâr ettiğim menzil harâba müşrif olup ta‘mîr ve meremmete muhtâc olmağın ma‘rifet-i mütevellî ve izn-i şer‘le kendi mâlım ile harcım mu‘accelesine mahsûb olmak üzere tecdîd ve ta‘mîr edip elli dört bin iki yüz altmış akçe harc u sarf etmiş idim. Hâlâ kıbel-i şer‘den üzerine varılıp tecdîd ve ta‘mîr olunan mevâzi‘ harc-ı mezbûre mütehammil midir keşf ve müşâhede olunmasını taleb ederim dedikde cânib-i şer‘den Mevlânâ Abdurrahman ve Mi‘mâr-ı hâssa Üstâd Ali b. Halil irsâl olunup onlar dahi zeyl-i kitâbda mastûretü’l-esâmî olan ehl-i vukūf ile mahall-i mezbûra varıp keşf ve müşâhede ettiklerinde menzil-i mezbûr hamâmının be-hesâb-ı şatrancî on sekiz zirâ‘ mermer döşemesi otuz altı zirâ‘ mahûfî ve harbendesi lökün ve dört aded kapısı ve bahçesinin dermesi ve matbahının otuz iki zirâ‘ tuğla döşemesi ve üç aded dahlîz kapıları ve iki yüz elli zirâ‘ dahlîz sakfı ve yirmi iki zirâ‘ tahta perde ve yüz otuz altı zirâ‘ mahlût tahta döşeme ve mevâzi‘-i selâsede üç kenîf ve kayağan döşemeli abdesthâne ve hesâb-ı mezbûr üzere yirmi zirâ‘ dolma duvar ve ocak ve nerdübân ve iki yüz dört zirâ‘ tavan va sofa müceddeden binâ olunmuş bulunup bu mezkûrâtın mermeri ve kireci ve tuğlası ve kayağan ve aşısı ve lökün ve tahtaları ve mertekleri ve direkleri ve pedavrası ve mismârı ve üstâdiyye ve neccâriyye ve hammâliye ve ırgadiyesi elli dört bin iki yüz altmış akçeye mütehammildir noksân ile olmaz deyu mi‘mâr-ı mezbûr ve sâir Müslimîn ittifâk ettiklerinde ittifâklarını mevlânâ-yı mezbûr mahallinde tahrîr ve gelip meclis-i şer‘de ihbâr eyledikde vâki‘ bi’t-taleb ketb olunup yedi tâlibe vaz‘ olundu. Tahrîren fî-evâhiri şehri Rebî‘i’l-evvel li-sene isneyn ve selâsîn ve elf. Şühûdü’l-hâl: el-Hâc Ömer Bey b. Mehmed el-cündî, Halil Bey b. Abdullah el-cündî, Mehmed Çelebi b. Nasuh el-cündî, Mustafa b. Mehmed, Ali b. Hüseyin er-râcil, Mehmed b. Ali, Mahmud Çelebi b. ( ) el-kâtib, Mehmed b. Hüseyin el-cündî Ahmed b. Davud er-râcil, Mehmed Çelebi eş-şehîr bi-Kemhacızâde.