Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 373 Hüküm no: 322 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdünnebî Efendi b. Hızır’ın vakfı olup Tunus Beylerbeyi Receb Paşa tarafından el konulan ve Recep Paşanın ölümünden sonra borçlu olduğu Havva Hatun bt. Hasan’a kiralanan ev davası Mahmiye-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hüseyin Bey b. Memi meclis-i şer‘-i şerîfde mahrûse-i Galata tevâbi‘inden kasaba-i Beşiktaş’da Yeni mahallede sâkine zahrü’l-muvakkarât Havvâ Hatun bt. Hasan Kapudan tarafından ikrâr-ı âti’z-zikri tasdîk için nehc-i mu‘teber üzere sâbitü’l-vekâle vekîl olan kıdvetü’l-zümreti’l-müteferrika Kâtib Mustafa Efendi b. Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafı Hüseyin Bey b. Abdullah mülkü ile ve bir tarafı şatt-ı bahr ile ve iki tarafı tarîk-i âm ile mahdûd olan menzil bundan akdem mâliki olan Abdünnebî Efendi b. Hızır mülkünde olduğu hâlde vakfedip vakfiyye-i ma‘mûlün-bihâsı nâtıka olduğu üzere süknâsı nefsine ba‘dehû evlâdına ve ba‘de’l-inkırâz utekāsına ve evlâd-ı utekāsına ve ba‘de’l-inkırâz icâresinden hâsıl olan rey‘ini Medîne münevvere fukarâsına îsâl ve tefrîka şart ve ta‘yîn edip ve ba‘dehû evlâdından ve utekāsından ve utekāsı evlâdından karîb ve ba‘îd bir şahs-ı müstahık kalmayıp Medîne-i Münevvere fukarâsına îsâl ve tefrîka şart ve ta‘yîn edip Medîne-i Münevvere fukarâsı için zabtı lâzım iken bundan esbak Tunus beylerbeyisi iken müteveffâ olup muhallefâtı mîrî tarafından kabz olunan merhûm Receb Paşa bi-gayrı hakkın üzerine vaz‘-ı yed ettikden sonra bazı ebniyesin nıkz ve hedm edip mâlıyla yerine bazı ebniye-i cedîde ihdâs ve iki sene mikdârı gasben tasarruf edip ba‘dehû müteveffâ oldukdan muhallefâtına cânib-i mîrîden vaz‘-ı yed eden Mehmed Bey b. Abdullah ile sâbıkā Rumeli kazaskeri olup hâlâ mahrûse-i mezbûrede hâkimü’ş-şer‘ olan a‘lemü’l-ulemâi’l-kirâm efdalü’l-fuzalâi’l-fihâm Mehmed Efendi b. Abdülgani Efendi hazretlerinin meclis-i âlîlerinde murâfa‘a olduğumuzda müteveffâ-yı mezbûr Receb Paşa menzil-i mezbûrdan hedm ettiği ebniyenin mebniyyen kıymeti için elli bin akçe ve iki sene tasarrufiçin ecr-i misl beş bin akçe cem‘an hâkim-i mûmâ-ileyh hükmü ile muhallefâtında lâzım olan elli beş bin akçeyi vakıf için emîn-i mezbûr yedinden ahz u kabz ettiğimden sonra müteveffâ-yı mezbûr Receb Paşa’nın ebniye-i cedîdesini [102b] maklû‘an kıymeti olan iki yüz bin akçeye vakfa enfa‘ olmağın vakıf için temellük ettiğimden sonra müteveffâ-yı mezbûr Receb Paşa’nın hâl-i hayâtında mezbûre Havvâ Hatun’dan istikrâz edip ve mukābelesinde menzil-i mezkûru mülkü olmak zu‘mu ile rehin vaz‘ ettik iki yüz bin akçesini ba‘de’l-isbât muhallefâtından merkūme Havvâ Hatun’a edâsı için sâbıkā Rumeli kazaskeri olan umdetü’l-ulemâi’l-izâm esbakü’l-fudalai’l-fihâm Mustafa Efendi b. Hüseyin hazretlerinin hükmü ve hükm-i mezkûrunu muhteviye olan hücceti mûcebince emîn-i mezbûra tenbîh olundukdan sonra emîn-i merkūm dahi ebniye-i cedîde-i mezkûrenin maklû‘an kıymeti olup cânib-i vakfdan cânib-i mîrîye temellük-i mezkûrem için edâsı lâzım olan iki yüz bin akçeyi mezbûre Havvâ Hatun’a deyn-i mezkûrunu edâ için ta‘yîn ve ol mukābelede merkūme Havvâ Hatun’u benim üzerime havâle-i şer‘iyye edip ben dahi bi’l-müvâcehe kabûl edip edâ sadedinde iken menzil-i mezkûru icâre-i mu‘accele ve müeccele ile tâlibîne arz edip ve karâr eden ve müzâyede ettirilmekde iken yüz yirmi beş bin akçe icâre-i mu‘accele ve yevmî yedişer akçe ücret-i mu‘accelede mezbûre Havvâ Hatun üzerinde karâr edip ziyâde eder âhar tâlibi zâhir olmamağın menzil-i mezbûru Havvâ Hatun’a iki yüz yirmi beş [bin] akçe icâre-i mu‘accele ve yevmî yedişer akçe ücret-i müecceleye îcâr edip ve icâre-i mu‘accele olan meblağ-ı mezbûr iki yüz yirmi beş bin akçenin yirmi beş bin akçesini yedinden vakıf için kabz ettiğimden sonra zimmetinde bâkī olan iki yüz bin akçeyi havâle-i mezkûre hasebi ile cânib-i vakfdan kendiye edâsı lâzım olan iki yüz bin akçesi ile takâs eyledik min-ba‘d mezbûre hatun menzil-i mezkûru vakfiyyet üzere mutasarrıfe olup mâdâm ki şart-ı merkūmîn üzere cânib-i vakfa edâsı lâzım olan yevmî yedişer akçe ücretin ikişer akçesi cânib-i mütevellîden vekâlet tarîki üzere meremmet-i lâzımesine sarf edip bâkīsi olan beşer akçeyi mâh be-mâh cânib-i vakfa edâ eyleye hâricden kimesne tasarrufuna mâni‘ olmaya dedikde mütevellî-i mezbûrun vech-i mübeyyen üzere olan ikrârı vekîl-i merkūm Mustafa Efendi dahi vicâhen ve şifâhen tasdîk ve tahkîk etmeğin vâki‘ hâl bi’t-taleb ketb olundu. Fî-gurreti Muharrem sene isneyn ve selâsîn ve elf. Şühûdü’l-hâl: Kasım Efendi b. es-Seyyid Halil, Safâyî Efendi b. ( ) el-müderris, Mehmed Efendi et-telhîsî, Hasan Ağa b. Abdülmennan el-müteferrika, İbrahim Bey b. Kurd Bey, İslâm Ağa b. Mustafa el-cündî, Mehmed Çelebi b. Karaca el-cündî, Ali Bey b. Sirâceddin el-cündî, Ahmed Bey b. ( ) el-cündî, Hızır Efendi el-imâm, es-Seyyid Mahmud Efendi ( ) el-cündî, Ali Çelebi b. ( ) el-mi‘mârü’l-hâssa