Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 374 Hüküm no: 323 Orijinal metin no: [103a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan olup Şemsimah bt. Abdullah’ın tasarufunda olan evin tamiri için yapılan masrafın tespiti Mahrûse-i İstanbul’da vâki‘ el-Hâc Hasan mahallesi sâkinelerinden Şemsimâh bt. Abdullah meclis-i şer‘de takrîr-i kelâm edip Haremeyn-i Şerîfeyn Evkāfı’ndan mahalle-i mezbûrede vâki‘ bir tarafı Hüsrev Kethüdâ vakfına bir tarafı Ca‘fer b. Abdülmennan mülküne ve bir tarafı Pervîz b. Abdullah mülküne ve bir tarafı tarîk-i âmma müntehî olup icâre-i mu‘accele ve müeccele ile mutasarrıf olduğum menzilin bazı mevâzi‘i harâba müşrif olup tecdîd ve ta‘mîre muhtâc oldukda bundan akdem izn-i <<şer‘>> mütevellî ve ma‘rifet-i şer‘le kendi mâlım ile harcım mu‘accelesine mahsûb olmak üzere müceddeden binâ ettiğim ahır üzerinde bir oda tûlen dokuz ve kadden dokuz buçuk be-hesâb-ı şatrancî seksen bir zirâ‘ taş duvar binâ olunmağa muhtâcdır cânib-i şer‘den üzerine varılıp keşf ve müşâhede olundukdan sonra zikr olunan oda ve duvarın binâ olunmasına izin verilmesi matlûbumdur dedikde cânib-i şer‘den Mevlânâ Fazlullah ve Hâssa mi‘mârlardan Üstâd Ali b. Halil irsâl olunup onlar dahi zeyl-i kitâbda mastûretü’l-esâmî olan ehl-i vukūf ile mahall-i mezbûra varıp vakf-ı merkūm mütevellîsi olan Hüseyin Ağa b. Memi mahzarında keşf ve müşâhede olundukda fi’l-hakīka zikr olunan ahır üzerinde bir oda ve tûlen ve kadden dokuz zira‘ olmak üzere be-hesâb-ı şatrancî seksen bir zirâ‘ taş duvar müceddeden binâ olmağa muhtâc olduğuna mi‘mâr-ı mezbûr ve sâir ehl-i vukūf ittifâk ettiklerinde vech-i meşrûh üzere ittifâklarını mevlânâ-yı mezbûr mahallinde tahrîr ve gelip meclis-i şer‘de ihbâr etmeğin bi’t-taleb kayd şud. Tahrîren fî-evâsıtı şehri Rebî‘ülâhir li-sene 1032. Şühûdü’l-hâl: Muharrem Efendi b. ( ) el-müderris, Abdülkerim Efendi b. Abdi el-müderris, Abdurrahman Efendi eş-şehîr bi-Kara Hoca, Mustafa Çelebi b. Mehmed ve gayruhüm.