Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 375 Hüküm no: 324 Orijinal metin no: [103a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papasoğlu mahallesinde Haremeyn Vakfı’ndan olup Mehmed Ağa b. Kasım’ın mutasarrıf olduğu evin tamirine yaptığı masrafın tespiti Mahrûse-i İstanbul’da vâki‘ Papasoğlu mahallesi sâkinlerinden fahrü’l-emâcid ve’l-a‘yân Mehmed Ağa b. Kasım meclis-i şer‘de takrîr-i kelâm edip Haremeyn-i Şerîfeyn Evkāfı’ndan üç bin beş yüz akçe icâre-i mu‘accele ile mutasarrıf olduğum bir tarafı Hasan Bey b. Abdullah mülküne ve bir tarafı Safiye bt. Hasan Bey mülküne ve tarafeyni tarîk-i âmma müntehî olan menzil bi’l-külliye münhedim olup müceddeden binâya muhtâc oldukda ba‘de’l-keşf ve’t-tahmîn sekiz bin akçe nıkz-ı binâ tahmîn olundukda izn-i mütevellî ve ma‘rifet-i şer‘le kendi mâlım ile harcım mu‘accelesine mahsûb olmak üzere elli sekiz bin sekiz yüz yirmi akçe harc u sarf etmiş idim. Hâlâ cânib-i şer‘den üzerine varılıp binâ-i mezkûrun harc-ı merkūme tahammülü var mıdır keşf ve müşâhede olunmasın taleb ederim demeğin savb-ı şer‘den Mevlânâ Fazlullah ve Hâssa mi‘mârlardan Üstâd Ali b. Halil irsâl olunup onlar dahi zeyl-i kitâbda mastûretü’l-esâmî olan ehl-i vukūf ile mahall-i mezbûra varıp vakf-ı mezbûr mütevellîsi olan Hüseyin Ağa b. Memi mahzarında keşf ve müşâhede ettiklerinde fi’l-vâki‘ etrâf-ı erba‘ası taş duvarlı ve bir ahır üzerinde iki bâb oda ve bir otluk ve anbârı ve iki büyük kapı ve iki kenîf ve üç aded demir pencere ve kaldırım ve dahlîz ve nerdübân ve etrâf-ı erba‘asının duvarları müceddeden binâ olunmuş bulunup bu mezkûrâtın be-hesâb-ı [103b] şatrancî beş yüz yirmi sekiz zirâ‘ taş duvarı her zirâ‘ı ellişer akçeden yirmi altı bin dört yüz akçeye ve hesâb-ı mezbûr üzere yüz doksan iki zirâ‘ tahta döşemesi dokuz bin altı yüz akçeye ve tûlen on yedi zirâ‘ arzen on beş zirâ‘ be-hesâb-ı şatrancî iki yüz elli beş zirâ‘ sakfın her zirâ‘ı altmışar akçeden on beş bin üç yüz akçeye ve iki kapı bin beş yüz akçeye ve iki kenîf bin iki yüz ve üç demir pencere altı yüz akçeye ve kaldırım ve dahlîz ve nerdübân bin ve tûlen on iki zirâ‘ tahta havlu her zirâ‘ı altmışar akçeden yedi yüz yirmi akçeye ve be-hesâb-ı şatrancî yüz zirâ‘ dolma duvar her zirâ‘ı yirmi beşer akçeden iki bin beş yüz akçeye ki cem‘an elli sekiz bin sekiz yüz yirmi akçe ile ancak olur noksân ile olmak mümkün değildir ve meblağ-ı mezbûrdan mâ‘adâ mukaddemâ verdiği üç bin beş yüz akçe mu‘accelesi ile altmış iki bin üç yüz yirmi akçe olup sekiz bin akçesi nıkz-ı binâya ihrâc olundukdan sonra mûmâ-ileyhin mu‘accelesi elli dört bin üç yüz yirmi akçe olur deyu mimâr-ı mezbûr ve sâir ehl-i vukūf ittifâk ettiklerinde vech-i meşrûh üzere ittifâklarını mevlânâ-yı mezbûr mahallinde tahrîr ve gelip meclis-i şer‘de ihbâr etmeğin mâ-vaka‘a bi’t-taleb ketb olundu. Tahrîren fî-evâhiri şehri Rebî‘ülâhir li-sene 1032. Şühûdü’l-hâl: Osman Bey b. Ahmed, el-Hâc Ahmed Çelebi b. Mehmed, Molla Halil b. Kemal, Ahmed er-râcil.