Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 376 Hüküm no: 325 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şemsimah Hatun bt. Abdullah’ın kiracısı olduğu vakıf evin sel yatağı üzerinde olması nedeniyle ecr-i mislinin yeniden tespit edilmesini istemesi Haremeyn-i Şerîfeyn Evkāfı’ndan olup mahrûse-i İstanbul’da el-Hâc Hasan mahallesinde vâki‘ lede’l-ahâlî ve’l-cîrân ma‘lûmü’l-hudûd olup büyût-ı müte‘addideyi müştemil olan menzilin icâre-i mu‘accele ve yevmî dört akçe ücret-i müeccele ile müste’ciresi olan işbu hâfızetü’l-kitâb fahrü’l-muhadderât Şemsimâh Hatun bt. Abdullah tarafından takrîr-i âti’l-beyâna vekîl olan fahrü’l-akrân Receb Aga b. Mehmed meclis-i şer‘-i şerîfde takrîr-i kelâm edip menzil-i mezbûrun altı seyl mecrâsı olup her yağmur yağdıkça seyl ile zebîl dolup tahliyyesi için harcı olmağla icâre-i müeccelesi ecr-i mislinden ziyâdedir kıbel-i şer‘den üzerine varılıp ecr-i misli keşf olunmasın taleb ederin dedikde cânib-i şer‘den Mevlânâ Fazlullah ve Hâssa mi‘mârlardan Üstâd Ali b. Halil irsâl olunup onlar dahi zeyl-i kitâbda mastûretü’l-esâmî olan ehl-i vukūf ile Müslimânlar ile menzil-i mezbûrun üzerine varılıp vakf-ı mezbûr mütevellîsi olan Hüseyin Ağa b. Memi mahzarında keşf ettiklerinde fi’l-vâki‘ mecrâ-yı mezbûr tahliyyesi harcı olmağla ecr-i mislinden [104a] ziyâdedir yevmî iki akçe ecr-i mislidir deyu mimâr-ı mezbûr ve sâir Müslimîn ittifâk ettiklerinde ittifâklarını mevlânâ-yı mezbûr mahallinde tahrîr ve gelip vukū‘u üzere meclis-i şer‘-i şerîfde haber vermeğin mâ-vaka‘a bi’t-taleb ketb olundu. Hurrire evsat-ı şehr-i Rebî‘i’l-âhir min-şühûri sene isneteyn ve selâsîn ve elf. Şühûdü’l-hâl: Muharrem Efendi el-müderris, Abdülkerim Efendi b. Abdi el-müderris, Abdurrahman Efendi eş-şehîr bi-Kara Hoca, Mustafa b. Mehmed.