Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 377 Hüküm no: 326 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Murad’ın tasarrufunda olan vakıf eve yaptığı masrafın tespiti Mahmiye-i İstanbul’da Davud Paşa iskelesinde Kasab İlyas mahallesi sâkinlerinden Mehmed Bey b. Murad meclis-i şer‘de bi’l-fi‘il Haremeyn-i Şerîfeyn Evkāfı’na mütevellî olan Hüseyin Ağa b. Memi mahzarında takrîr-i kelâm edip evkāf-ı mezbûreden mahalle-i mezkûrede vâki‘ iki bin akçe icâre-i mu‘accele ile mutasarrıf olduğum menzilin ancak bir bâb tahtânî odası olup kābil-i süknâ olmamak ile bundan akdem kendi mâlım ile harcım mu‘accelesine mahsûb olmak üzere müceddeden bir fevkānî oda binâ ve bazı mevâzi‘ini ta‘mîr ve meremmet edip on yedi bin altı yüz akçe harc u sarf etmiş idim. Hâlâ kıbel-i şer‘den üzerine varılıp mütevellîsi mahzarında tahammülü keşf ve mesâha olunmasın taleb ederim dedikde cânib-i şer‘den Mevlânâ Fazlullah irsâl olunup ol dahi Hâssa mi‘mârlardan Üstâd Ali b. Halil ve zeyl-i kitâbda mastûretü’l-esâmî olan ehl-i vukūf ile varıp keşf ve mesâha ettiklerinde tûlunun bir tarafı on dört zirâ‘ altı parmak ve bir tarafı sekiz zirâ‘ ve arzen on dört zirâ‘ be-hesâb-ı şatrancî yüz elli beş buçuk zirâ‘ arsa üzerinde bir bâb tahtânî odanın bazı mevâzi‘i ta‘mîr ve müceddeden bir bâb fevkānî oda ve etrâfının havlusu binâ olunmuş bulunup bu mezkûrâtın be-hesâb-ı şatrancî altmış zirâ‘ tahta döşemesinin her zirâ‘ı ellişer akçeden üç bin akçeye tûlen dokuz zirâ‘ ve arzen sekiz zirâ‘ be-hesâb-ı şatr[ancî] yetmiş iki zirâ‘ sakfının her zirâ‘ı hesâb-ı mezbûr üzere üç bin altı yüz akçeye ve tûlen yirmi ve kadden dört zirâ‘ be-hesâb-ı şatrancî yüz sekiz zirâ‘ dolma duvarının her zirâ‘ı yirmi beş akçeden iki bin iki yüz ve musandıra ve kapı iki bin akçeye ve nerdübân ve ocak bin akçe ve otuz altı zirâ‘ tahta havlusunu her zirâ‘ı ellişer akçeden bin sekiz yüz ve kenîfi bin akçeye ve tahtânî odanın ta‘mîr ve meremmâtı ve sâir mesârifi üç bin akçeye cem‘an on yedi bin akçeye tahammülü vardır noksânla olmaz deyu mimâr-ı mezbûr ve sâir ehl-i vukūf ittifâk ettiklerinde mevlânâ-yı mezbûr mahallinde tahrîr ve gelip meclis-i şer‘de ihbâr etmeğin mâ-vaka‘a bi’t-taleb ketb olundu. Tahrîren fî-evâili Cumâdelûlâ li-sene 1032. Şühûdü’l-hâl: Mefharü’s-sülehâ eş-Şeyh Mustafa Efendi, Osman Bey b. ( ) el-cündî, Kemâleddin Efendi b. ( ) el-imâm, Bekir b. İbrahim el-cündî, Mustafa Çelebi b. ( ) el-kâtib, Ali b. İbrahim el-cündî, Mehmed Çelebi b. ( ) teberdâr, el-Hâc Bektaş, Ali b. Abdullah.