Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 377 Hüküm no: 327 Orijinal metin no: [104b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan olup Osman Bey b. Arslan’ın tasarrufunda olan evin tamiri için yaptığı masrafın tespiti Mahmiye-i İstanbul’da Elvanzâde mahallesi sâkinlerinden sâhibü hâze’l-kitâb fahrü’l-akrân Osman Bey b. Arslan meclis-i şer‘de takrîr-i kelâm edip Haremeyn-i Şerîfeyn Evkāfı’ndan mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup ulvî ve süflî dört bâb beyti müştemil olan mu‘accele ve müecceleli menzilim bundan akdem harâba müşrif olup kābil-i süknâ olmamak ile hedm olunup müceddeden binâya ihtiyâcı olduğu ebniye ve sukūfa vukûfu olan bî-[garaz] Müslimîn haberleri ile müte‘ayyen ve ber-vech-i tahmîn nıkzı ancak otuz bin akçe edip ziyâdeye tahammülü olmadığı mütebeyyin oldukdan sonra müceddeden binâ edip kendi mâlımdan elli dokuz bin dokuz yüz on akçe harc etmiş idim. Hâlâ kıbel-i şer‘den üzerine varılıp mütevellî mahzarında tahammülü keşf olunmasın talep ederin dedikde cânib-i şer‘den Mevlânâ Fazlullah irsâl olunup ol dahi mi‘mâr-ı hâssa Üstâd Ali b. Halil ve zeyl-i hüccetde mastûretü’l-esâmî ehl-i vukūf Müslimîn ile menzil-i mezbûra varıp keşf ettiklerinde tûlen yirmi üç zirâ‘ ve arzen on iki zirâ‘ be-hesâb-ı şatrancî iki yüz yetmiş altı zirâ‘ arsa üzerinde kendi mâlıyla mücedded ve hâriciyye ve dâhiliyyesinde üç bâb fevkānî oda ve iki sofa ve tahta-pûş ve iki kenîf ve iki bâb tahtânî oda ve iki yüz elli zirâ‘ taş duvar ve dört bâb dükkân binâ olunmuş bulunup bu mezkûrâtın üstâdiyye ve neccâriyye ve hammâliye ve ırgadiyesiyle iki yüz elli zirâ‘ taş duvarı her zirâ‘ı ellişer akçeden on iki bin beş yüz akçeye ve dört yüz altmış zirâ‘ dolma duvarı otuzar akçeden on üç bin sekiz yüz akçeye ve iki yüz yetmiş altı zirâ‘ tahta döşemesi ellişer akçeden on üç bin sekiz yüz akçeye ve üç yüz yirmi zirâ‘ sakfı altmışar akçeden on dokuz bin üç yüz yirmi akçeye ve yüz seksen zirâ‘ tavan kırkar akçeden yedi bin iki yüz akçeye ve dört aded demir penceresi bin altı yüz akçeye ve beş aded çarşife penceresi bin iki yüz elli akçeye ve altı aded kapısı bin sekiz yüz akçeye ve bir sokak kapısı bin akçeye ve iki kenîf bin beş yüz akçeye ve iki nerdübânı bin beş yüz akçeye ve altı aded trabuzan bin sekiz yüz akçeye bu mecmû‘u seksen dokuz bin dokuz yüz on akçe ile ancak hâsıl olur noksân ile mümkün değildir deyu mimâr-ı mezbûr ve sâir Müslimîn ittifâk ettiklerinde nıkz-ı mezbûr ihrâc olunup elli dokuz bin dokuz yüz on akçe mu‘accelesine mahsûl olduğunu mevlânâ-yı mezbûr mahallinde tahrîr edip ba‘dehû gelip vukū‘u üzere ihbâr ettikde mâ-vaka‘a bi’t-taleb ketb olundu. Tahrîren fî-evâhiri şehri Rebî‘i’l-âhir min-şühûri sene isneyn ve selâsîn ve elf. Şühûdü’l-hâl: Hasan Çelebi b. ( ) el-cündî, Monna Mehmed Çelebi b. ( ), Bekir Ağa b. Hüseyin Ağa, Mustafa Efendi b. Mehmed, Rıdvan Halîfe b. ( ) el-cündî, Halil Bey b. ( ) el-cündî, Mehmed Çavuş b. Hüseyin, Ahmed Çavuş b. Davud, Hüseyin b. ( ) el-cündî.