Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 378 Hüküm no: 328 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cerrahbaşı mahallesinde Fatma Hatun Vakfı olan evi kiralayan İsmail Çelebi’nin kiraladığı evin arsanın keşf ve ölçülmesi talebi Mahmiye-i İstanbul’da Cerrâhbaşı mahallesinde sâkin İsmail Çelebi tarafından vekîl olan Yusuf Bey b. Abdullah meclis-i şer‘-i şerîfde bi’l-fi‘il Haremeyn-i Şerîfeyn Evkāfı mütevellîsi olan Hüseyin Ağa b. Memi takrîr-i kelâm edip bundan akdem mahalle-i mezbûrede sâkinelerinden iken vefât eden Fâtıma Hatun bt. ( ) hâl-i hayâtında mahalle-i merkūmede vâki‘ inde’l-ahâlî ve’l-cîrân ma‘lûmetü’l-hudûd olan arsa üzerinde mebnî fevkānî ve iki bâb odayı ve odunluk ve muhavvatayı ve bi’r-i mâyı ve kenîfi müştemil olan mülk menzilini evvelâ kendi nefsine ve ba‘dehû evlâdına ve ba‘de’l-inkırâz Haremeyn-i Şerîfeyn fukarâsına vakf ve şart edip hâlâ merkūme Fâtıma vefât edip menzil-i mezbûr bi-cümleti’t-tevâbi‘ Haremeyn’e intikāl edip îcâr için beyne’t-tâlibîn arz ve müzâyede olunup müvekkilim merkūm İsmail Çelebi üzerinde on altı bin akçe icâre-i mu‘accele ve yevmî birer akçe icâre-i müeccele ile karâr edip vech-i meşrûh üzere mezbûra bin otuz bir şehr-i Rebî‘ülevvel’inin evâilinde Haremeyn mütevellîsi olan Veli Ağa [105a] mezbûra îcâr edip yedine mümzâ ve mahtûm temessük verip lâkin kıbel-i şer‘den üzerine varılıp arsası keşf ve mesâha olunmamışdır keşf ve mesâha olunmak için kıbel-i şer‘den adam taleb ederim demeğin Mevlânâ Fazlullah ve Hâssa mi‘mârlardan Üstâd Ali b. Halil irsâl olunup onlar dahi zeyl-i kitâbda mastûretü’l-esâmî olan ehl-i vukūf ile mahall-i mezbûra varıp mütevellî-i mezbûr mahzarında keşf ve mesâha ettiklerinde arsa-i mezbûrenin tûlu yirmi sekiz zirâ‘ ve on sekiz parmak ve arzının bir tarafı on iki zirâ‘ dokuz parmak ve bir tarafı altı zirâ‘ ve on parmak be-hesâb-ı şatrancî iki yüz yetmiş üç zirâ‘ olduğunu mimâr-ı mezbûr ve sâir ehl-i vukūf ittifâk ettiklerinde vech-i meşrûh üzere ittifâklarını mevlânâ-yı mezbûr mahallinde tahrîr ve gelip meclis-i şer‘de ihbâr etmeğin mâ-vaka‘a bi’t-taleb ketb olundu. Tahrîren fî-evâsıtı şehri Cumâdelûlâ li-sene isneteyn ve selâsîn ve elf. Şühûdü’l-hâl: Mustafa Çelebi b. ( ) el-kâtib, Ali Beşe b. ( ) el-câbî, Fethullah b. Yahya el-bevvâbü’s-sultânî, Mustafa b. Süleyman ve gayruhüm. (Mühür) İbtidâ-i fahrü’l-müderrisîn ve zahrü’l-müdakkıkîn Mevlânâ Ahmed Efendi el-müfettiş bi’l-evkāfi’ş-şerîfe.