Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 381 Hüküm no: 330 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midilli’de Sinan Çelebi Vakfı olup Haremeyn Evkafı’na intikal eden bahçenin gelirini almak için vekil tayin edilen Ali Bey b. Ahmed’in hüccet talebi Sâhibü hâze’l-kitâb ebnâ-i sipâhiyândan fahrü’l-emâsil ve’l-akrân Ali Bey b. Ahmed meclis-i şer‘-i şerîfe hâzır olup takrîr-i kelâm kılıp Midilli kazâsında karye-i Katotritoz nâm karye dâhilinde Aya Marine demekle ma‘rûfe hadîkayı Dergâh-ı âlî yeniçerilerinden Sinan Çelebi b. Nasuh nâm kimesne mülkünde iken utekāsına vakfedip vakfiyyesine utekādan ziyâdesi Medîne-i Münevvere fukarâsına ola deyu şart edip on seneden beri Haremeyn-i Muhteremeyn Evkāf-ı şerîfesine intikāl edip ba‘de’l-intikāl evkāf-ı şerife-i mezbûra âid olan mahsûlü ve ba‘de’l-yevm vâki‘ olacak mahsûlü dahi ahz u kabz etmesine bi’l-fi‘il evkāf-ı mezbûre mütevellîsi olan ebnâ-i sipâhiyândan fahrü’l-emâsil ve’l-akrân Hüseyin Ağa tevkîl tarîkiyle bana deruhde edip ben dahi vekâleti kabûl ettikden sonra minvâl-i mezbûr üzere tevkîl ve deruhde ettiğine hatemiyle mahtûm ve imzâsıyla mümzâ elime temessük vermişdir. Nazar olunup mûcebince savb-ı şer‘-i şerîfden dahi bir hüccet-i şer‘iyye verilmek matlûbumdur deyu mütevellî-i müşârun-ileyhin hatemi ve hattı müştemil târîh-i kitâb şehrinin gurresiyle müverrah temessükü ibrâz edip nazar olundukda her vechile merkūm Ali Bey’in kelâm-ı meşrûhuna mutâbık bulmalı savb-ı şer‘-i şerîfden dahi mûcebince işbu hurûf-ı sebîl-i temessük ketb olunup yed-i tâlibe def‘ olundu ki lede’l-hâce müzekkir-i mâ-cerâ ola. Cerâ ve hurrire fi’l-yevmi’s-sâbi‘ min-Recebi’l-mürecceb li-sene isneyn ve selâsîn ve elf. Şühûdü’l-hâl: Hasan Çelebi b. Hüseyin el-mi‘mâr, Fahrü’l-müderrisîn Halil b. Mahmud, Mustafa b. Lutfullah el-bevvâbü’s-sultânî, Mehmed Çelebi b. Abdülgani es-sahhâf, Mehmed Çelebi b. Musa el-Eyyûbî.