Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 382 Hüküm no: 331 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samanviran mahallesinde Şah Hatun Vakfı olup Medine fukarâsına intikal eden evin Pazarbaşı Ahmed b. Abdi tarafından kiralandığı Sebeb-i tahrîr-i hurûf oldur ki; mahrûse-i İstanbul’da hâlâ mütevellîsi olduğum Medîne-i Münevvere Evkāfı’ndan olup Samanviran mahallesinde vâki‘ bir tarafı Ahmed Reis mülküne ve bir tarafı vakf-ı mezbûr ve iki tarafı tarîk-i âm ile mahdûd olan vakıf menzili bundan akdem Şâh nâm hatun bt. ( ) mülk menzilini evvelâ kendi nefsine ve evlâd-ı evlâdına ba‘de’l-inkırâz Medîne-i Münevvere fukarâsına vakf ve şart etmeğin hâlâ evlâddan Rukiye Hatun nâm kimesne sâkin iken vefât edip menzil-i mezbûr cümle tevâbi‘i ve levâhıkı ile vakf-ı şerîfe âid olup mahlûl kalmağın vakf cânibinden nidâ olunup tâlibi münkatı‘ oldukdan sonra işbu hâmilü’l-hurûf Bâzârbaşı Ahmed b. Abdi’nin üzerinde yevmî üç akçe icâre-i müeccele ve yirmi bin beş yüz [akçe] icâre-i mu‘accele ile karâr edip âhardan kimesne gelip ziyâde etmeyip vech-i meşrûh üzere mezbûr Bâzârbaşı Ahmed b. Abdi’ye îcâr ve teslîm eyledim ol dahi istîcâr ve kabûl ettikden sonra icâre-i mu‘accelesi olan meblağ-ı mezbûr yirmi bin beş yüz akçeyi yedinden evkāf-ı mezbûr için bi’t-tamâm alıp kabz eyledim ba‘de’l-yevm mezbûr Ahmed kendi mâlıyla her ne ki binâ ve ihdâs ederse kimesne mâni‘ olmayıp ettiği binâ vakfın olup harc u sarf olunan meblağ vakfda mezbûrun icâre-i mu‘accelesine mahsûb olmak üzere izin ve temessük taleb etmeğin ben dahi tevliyetim hasebi ile izin verdim ve mâh be-mâh icâre-i mu‘ayyenesin cânib-i vakfa edâ eyleye bir ferd gelip tasarrufuna mâni‘ olmak için bu hurûf li-ecli’t-temessük ketb olunup yedine verildi ki vakt-i hâcetde lâzım olup temessük edine. Tahrîren fî-evâsıtı şehri Saferi’l-muzaffer li-sene hamse ve ışrîn ve elf. Mine’l-fakīr Hasan el-mütevellî.