Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 385 Hüküm no: 334 Orijinal metin no: [107b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Bey b. Mehmed’in Midilli adasında Katotos köyünde Aya Marina’da bulunan bahçelerinin vakfiyesi Allahu hasbî. Sûretü sureti’l-vakfiyyeti’l-müstensihati ani’l-asli bi-imzâ’i Mevlânâ Mehmed b. Emrullah el-müvellâ hilâfeten bi-medîneti Kostantıniyyeti’l-mahmiye nemekahü’l-hakīr es-Seyyid Fahreddin el-Kādî bi-Midilli el-müfettiş -ufiye anhu- Yu‘teberu mâ-fîhî inde sübûtihî ve ademi münâfihî şer‘an harrerehü’l-fakīr Yahya b. Zekeriya el-Kādî bi-asâkiri Rumeli -ufiye anhümâ- Fî-zımnihî mâ yu‘teberu inde’s-sübûti’l-mu‘teberi ketebehu Mehmed b. Sadeddin el-fakīr -ufiye anhümâ- Hamd ü sipâs ve şükr-i bî-kıyâs ol hâlık-ı cin ve nâs ve rezzâk-ı ukūl ve havâs hazretine ki; nüsha-i insânı ebda‘-i üslûbda tasvîr ve inşâ ve ahsen-i takvîmde îcâd ve imlâ eyledi ve ulûf-i tahiyyât-ı nâ-mahdûd ve sunûf-ı teslîmât-ı gayri ma‘dûd ol kāimmakām-ı mahmûd sâhib-i havz-ı mevrûd câmi‘-i cemî‘-i cihân-ı vefâ ve hâvî cümle sıfat-ı safâ Ebu’l-kāsım Muhammed Mustafa aleyhi mine’s-salavâti mâ-hüve’l-evlâ ve’l-ahrâ hazretine ki tafsîl-i sıfat-ı kemâli muhâl ve tavsîf-i envâr-ı cemâlinin icmâlinde akl-ı insân bî-mecâldir ve âl ve ashâb-ı ehl-i temkîn husûsan çehâryâr-i güzîn hazretlerine olsun rıdvânullâhi te‘âlâ aleyhim ecma‘în ve sakāhümü’l-mu‘în min-mâ’in ma‘în ammâ ba‘d: işbu sahîfe-i sahîha-i şer‘iyyenin sâhibi ve vesîka-i enîka-i mer‘iyyenin râgıbı Cezîre-i Midilli kal‘ası sâkinlerinden râtibü’l-hayrât ve’l-hasenât râgıbü’l-meberrât ve’s-sadakāt Sinan Bey b. Mehmed vakf-ı âti’l-beyâna li-ecli’t-tescîl mütevellî nasb eylediği Kazganîzâde demekle ma‘rûf Mehmed Çelebi b. Ali ile ma‘an meclis-i şerî‘at-ı şerîfe-i mutahharada niyet-i hâlise ve taviyet-i sâfiye ile ikrâr u i‘tirâf edip dedi ki cezîre-i mezbûrede Katotritos nâm karyede vâki‘ beyne’l-ahâlî Aya Marine demekle ma‘rûf bir tarafı vâdi ve bir tarafı cebel ve bir tarafı tarîk-i âm ve bir tarafı deryâ ve bir tarafı Nay gölü ile mahdûd ve mümtâz içinde bağ ve çayırı ve dört bâb tahtânî evleri ve bir bâb fevkānî evi ve bir kulleyi muhtevî eşcâr-ı müsmire-i mütenevvi‘ayı müştemil mülk bahçesini ve kezâlik civârında beyne’l-ahâlî Mavera demekle ma‘rûf bir tarafı vâdi ve bir tarafı cebel ve bir tarafı tarîk-i âm ve bir tarafı Huri bt. Timur nâm hatun mülkü ile mahdûd ve mümtâz hârici iki bâb fevkānî ve üç bâb tahtânî evi ve ahırı ve yağ değirmenini ve samanlığı ve dâhili üç bâb fevkānî ve üç bâb tahtânî ve bir kilârı ve fırını muhtevî eşcâr-ı müsmire-i mütenevvi‘ayı müştemil mülk bahçesini cümle tevâbi‘ ve levâhıkı ve kâffe-i merâsim ve merâfıkı ile hasbeten lillâhi’l-azîm ve haseneten li-rûhi resûli’l’l-kerîm vakf ve habs edip şart eyledi ki mâdâm ki bu fenâ dünyâda câlis ve kabâ-yı bekā-yı lâbis ola kendisi zikr olunan hadîkalara keyfe mâ yeşâ mutasarrıf ola çünki bi-emri’llâhi azze ve celle ecel-i müeccel nesf-i nefîsine cârî ola kezâlik zikr olunan hadîkaların tasarrufunu bi-cümletihâ zevci Fâtıma bt. Mehmed nâm hatuna meşrûta olup müdde-i hayâtında mutasarrıfe ola ve ba‘de vefâtihâ vâkıf-ı mezbûrun evlâdına ve evlâd-ı evlâdına ve evlâd-ı evlâd-ı evlâdına meşrûta olup ile’l-inkırâz zükûr ve inâsı ale’s-seviyye mutasarrıfı olalar ve vâkıf-ı mezbûrun vefâtından sonra hasbî tevliyeti merkūm Mehmed’e ve ba‘dehû mutasarrıf olanlara ve nezâret-i hasbiyesi dahi kal‘a-i mezbûre ahâlîsine meşrûta ola ve kazâ-i İlâhî ve hükm-i Rabbânî ile zikr olunan erbâb-ı inâsı? münkarıza olursa evkāf-ı mezbûreye kal‘a-i mezbûre ahâlîsinden mu‘temed ve dîndâr bir kimesne re’y-i hâkim ile mütevellî nasb olunup evkāf-ı mezbûre yed-i mütevellî ile îcâr ve her sene hâsıl olan icâresi Medîne-i Münevvere sallallâhu alâ-münevvirihâ evkāfı nâzırları yediyle Medîne-i Münevvere’ye irsâl ve rûh-ı resûl-i ekrem sallallâhu aleyhi ve sellem için fukarâsına îsâr ve nisâr oluna ve evkāf-ı mezbûrenin tebdîl ve tağyîri ve tağlîl ve teksîri müddet-i hayâtında kendiye meşrût ve yed-i meşiyyetine merbût ola deyip şerâit-i vakfı tamâm ve zavâbıtını kemâ yenbağî itmâm edip li-ecli’t-tescîl mütevellî nasb eylediği mezkûr Mehmed Çelebe’ye teslîm ve ol dahi kabz ve tesellüm ve tasarruf eyledim deyu i‘tirâf edip tarafeynden ikrâr ve tesâdık vâki‘ oldukdan sonra vâkıf-ı sehhelallâhu aleyhi hevlü’l-mevâkıf işbu muvakkı‘-ı kitâb-ı müşgîn nikāb olan a‘lemü’l-ulemâi’l-izâm ve efdal-i fudelâi’l-fihâm muhakkık-ı hakāyık-ı şer‘-i mübîn müdekkık-ı dekāyık-ı dîn-i metîn ma‘den-i adâlet ve menî‘-i istikāmet ferîd-i asara ve vahîd-i avâna hazretlerinin huzûr-ı şerîflerinde vakf-ı akār ve efdal-i eimme-i ahyâr ve ekmel-i ecille-i kibâr Hazret-i İmâm-ı Azam mezheb-i muhtârları üzere ba‘de’t-teslîmi ile’l-mütevellî lüzûmu mün‘adim olduğuna vâkıf olmağla vakf-ı mezbûrdan udûl ve silk-i mülküne duhûl kasd ettikde mütevellî cevâb-ı savâb verip vakf-ı akār inde Ebî Yusuf el-İmâmü’s-sânî mücerred “vakaftü” ve inde’l-imâm Muhammed b. Hasan eş-Şeybânî “ma‘a’t-teslîm ile’l-mütevellî” vakf lâzımdır deyip hâkim-i mûmâ-ileyhden hükm taleb eylemeğin hâkim-i nâfizü’l-ahkâm [108a] hazretleri akār-ı mezbûrun sıhhat-i lüzûmuna ve husûs ve umûmuna alâ-re’yi men-yerâhu mine’l-eimmeti’l-müctehidîn rıdvânullâhi te‘âlâ aleyhim ecma‘în hükm-i muhkem-i şer‘î ve kazâ-i mübrem-i mer‘î eyleyip ba‘de zâ aslâ ve ebeden tahvîl ve ta‘tîli muhâl ve ibtâl ve ihtilâli mümteni‘ü’l-ihtimâl oldu. “Fe men-beddelehû ba‘de mâ-semi‘ahu fe-innemâ ismühû ale’llezîne yübeddilûnehû innellâhe semî‘un alîm” ve ecrü’l-vâkıf ale’l-hayyi’l-cevâdi’l-kerîm. Cerâ zâlike ve hurrire fî-evâhiri Zilhicceti’ş-şerîfe sene aşer ve elf. Şühûdü’l-hâl: Ahmed Kethüdâ b. Mustafa, İsmail Çavuş b. Ahmed Çavuş, Ali Çavuş b. Hasan Çavuş, İbrahim Çavuş b. İlyas, Mustafa Çelebi el-vâ‘iz, Hüseyin Çelebi b. Ahmed Ağa, İbrahim Çelebi b. el-Hâc Ali, Mustafa Çelebi b. el-Hâc Ali, Ca‘fer Bey ( ) er-râcil, Mustafa Çelebi b. Kara Muslu, Hasan Çelebi el-Hâc Ali, Mehmed Çelebi b. Aydın, Muslu Çelebi b. Şaban, Mehmed Bey Kethüdâ-yı kal‘a ve gayruhüm.