Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 387 Hüküm no: 335 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Subaşı b. Abdullah’ın vakfı olup Haremeyn Vakfı’na intikal eden evi kiralayan Hasan ve karısı Emine’nin hüccet talebi <> Sâhibü hâze’l-kitâb mahmiye-i Kostantıniyye mahallâtından Karagümrük nâm mevzi‘ kurbünde vâki‘ merhûm Ali Paşa mahallesi sâkinlerinden Dergâh-ı âlî yeniçerilerinden Hasan Beşe b. Abdullah ve zevcesi Emine bt. Abdullah meclis-i şer‘-i şerîfe hâzırân olup takrîr-i kelâm ve ta‘bîr ani’l-merâm kılıp merhûm Süleyman Subaşı b. Abdullah âhirü’l-emr Medîne-i Münevvere -sallallâhu te‘âlâ alâ-münevvirihâ- fukarâsına vakfettiği büyût ve muhavvata ve kenîf ve müşterek bi’r-i mâyı müştemil olan menzil ber-mûceb-i şart-ı vâkıf hâlâ Medîne-i Münevvere fukarâsına intikāl etmiş olmağın bi’l-fi‘il evkāf-ı mezbûre mütevellîsi olan ebnâ-i sipâhiyândan Hüseyin Bey b. Memi nâm kimesne menzil-i mezbûru icâre-i mu‘accele ve ücret-i müeccele ile tâlibîn beyninde kirâren ve mirâren arz edip âhirü’l-emr on bin akçe icâre-i mu‘accele ve beher şehr kırk beşer akçe ücret-i müeccele ile bizim üzerimizde karâr edip kimesne bir akçe ve bir habbe dahi ziyâde ile kabûl etmemeğin mütevellî-i mezbûr bizden on bin akçe icâre-i mu‘accele ahz u kabz edip menzil-i mezbûru dahi ba‘de’t-tahliyye târîh-i kitâb şehri gurresinde beher mâh kırk beşer akçe ücret-i müeccele ile ben tevliyetim hasebi ile îcâr ve biz dahi minvâl-i meşrûh üzere istîcâr ettiğimizden sonra tasarrufu için yedlerimize temessük def‘ ve i‘tâ etmişdir nazar olunup mûcebince kıbel-i şer‘-i şerîfden dahi elimize hüccet-i şer‘iyye verilmek matlûbumuzdur deyu mütevellî-i mezbûr hatm ü hattını müştemil ve târîh-i mezbûr ile müverrah temessükünü ibrâz edip nazar olundukda min-külli’l-vücûh mezbûrân Hasan Beşe ve Emine Hatun’un kelâmlarına mutâbık bulunmağın savb-ı şer‘-i şerîfden işbu hurûf ber-sebîl-i temessük ketb ve imlâ ve yed-i tâlibeyn-e mezbûreyne def‘ ve i‘tâ olundu. Tahrîren fi’l-yevmi’s-sâmin min-Şa‘bâni’l-mu‘azzam li-sene isneyn ve selâsîn ve elf. Şühûdü’l-hâl: Abdurrahman Efendi b. ( ) el-kādî, Mehmed Halîfe b. Ali el-imâm, Mehmed Halîfe b. Ali el-müezzin, İbrahim b. Hayyâmî, Receb b. Abdullah er-râcil, Şaban b. Osman, Mahmud b. Hamza el-kâtib, el-Hâc Ahmed b. Abdullah, Hasan Halîfe el-haffâf, Abdi Çelebi b. Mahmud.