Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 391 Hüküm no: 337 Orijinal metin no: [109b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nasuh Vakfı’ndan olup Ahmed Efendi b. Hüseyin’in tasarrufunda olan vakıf evin kullanım hakkını müderris Cafer Efendi’ye devrettiği Dârü’s-saltanati’s-seniyye Kostantıniyyetü’l-mahmiye mahallâtından Kalenderhane mahallesinde sâkin Ahmed Efendi b. Hüseyin meclis-i şer‘-i şerîfde sâhibü hâze’l-kitâb sulehâ-i ulemâdan fahrü’l-müderrisîn Ca‘fer Efendi b. eş-Şeyh Behram muvâcehesinde ikrâr ve takrîr-i kelâm edip sâhibü’l-hayrât merhûm Nasuh Vakfı’ndan olup mahalle-i merkūmda vâki‘ bir tarafı Müezzin Kemal vakfı ve üç tarafı tarîk-i âm ile mahdûd bir bâb beyt-i süflî ve iki oda ve bi’r-i mâyı ve cüneyneyi ve kenîfi müştemil olan menzilin süknâsı ulemâya meşrûta olmağla <> menzil-i mezbûr mukaddemâ zümre-i müderrisînden Mustafa Efendi b. Ahî nâm kimesnenin tasarrufunda olup tasarrufunda iken izn-i şer‘ ve ma‘rifet-i mütevellî ile kendi mâlı ile nefsi için fevkānî bir selâmlık binâ ve ihdâs edip bana ferâğ lâzım geldikde zikr olunan selâmlığa harc ettiği on bir bin akçeyi benden aldıkdan sonra menzil-i mezbûrun süknâsını hüsn-i ihtiyârıyla bana ferâg [110a] ve tefvîz edip ben dahi kabûl ve tefevvüz ettikden sonra kendim dahi bir hamâm ve bir tahta-pûş ve bir kaldırım ve bir kilâr izn-i şer‘ ve ma‘rifet-i mütevelliyle nefsim için kendi mâlım ile binâ edip dokuz bin akçe sarf etmiş idim. Hâlâ ben dahi diyârdan hâlâ nakl etmek murâd ettiğime binâen merkūm Mustafa Efendi’ye mukaddemâ verdiğim on bir bin akçeyi ve ba‘dehû ben dahi ebniyeye sarf ettiğim dokuz bin akçeyi cem‘an yirmi bin akçeyi mûmâ-ileyh Ca‘fer Efendi’den ahz u kabz edip hâlâ menzil-i mezkûrun süknâsı ben dahi hüsn-i ihtiyârım ile müşârun-ileyh Ca‘fer Efendi’ye ma‘rifet-i mütevelliyle fâriğ oldum ba‘de’l-yevm menzil-i mezbûrda eğer binâsında ve eğer gayri eşyâsında vechen mine’l-vücûh benim alâka ve medhalim kalmadı. Ba‘de’l-yevm merkūm Mustafa Efendi ve ben kendi mâlım ile ihdâs ettiğimiz ebniyenin cümlesi mûmâ-ileyh Ca‘fer Efendi’nin mülküdür. Şimdiden sonra keyfe mâ yeşâ ebniye-i mezbûreye mutasarrıf olsun dedikde mukırr-ı merkūm Ahmed Efendi’yi ikrâr-ı meşrûhunda el-mukarrun-lehü’l-merkūm Ca‘fer Efendi vicâhen tasdîk ve şifâhen tahkīk ettikden sonra işbu vesîka li-ecli’t-temessük ketb olunup yed-i tâlibine def‘ olundu. Tahrîren fî-evâhiri Zilhicceti’ş-şerîfe li-sene isneyn ve selâsîn ve elf. Şühûdü’l-hâl: Fahrü’l-müderrisîn Mahmud Efendi imâm-ı hadîka-i sarây-ı cedîd, Mefharü’l-müderrisîn Rıdvan Efendi b. ( ) Hâce-i bostancıbaşı sâbıkā, zahrü’l-müderrisîn Mahmud Efendi b. Ömer, Halil Efendi b. el-Hâc Mahmud el-müderris, kıdvetü’l-a‘yân Ahmed Efendi Kâtib-i ağa-yı ser-mi‘mârân, Ali Efendi İmâm-ı ağa-yı ser-mi‘mârân, Mehmed Efendi b. el-Hâc Pîrî el-müsta‘id, Mehmed Çelebi b. Abdülgani, fahrü’l-cüyûş Ramazan Çavuş b. ( ) Kethüdâ-yı ser-mi‘mârân, Mehmed Çelebi b. Musa Bey el-Eyyûbî Hasan Çelebi b. Hüseyin Mi‘mâr-ı Ayasofya