Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 400 Hüküm no: 342 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Memi’nin İmam İbrahim Çelebi’nin para vakfından aldığı borcu mütevellisine ödediği Bi’l-fi‘il Haremeyn-i Muhteremeyn Evkāfı’na mütevellî olan ebnâ-i sipâhiyândan fahrü’l-emâsil ve’l-akrân Ali Bey b. Mehmed meclis-i şer‘-i şerîfde sâhibü hâze’l-kitâb sâbıkā evkāf-ı mezbûre mütevellîsi olan yine ebnâ-i sipâhiyândan kıdvetü’l-emâcid ve’l-a‘yân Hüseyin Ağa b. Memi mahzarında ikrâr ve takrîr-i kelâm kılıp bundan akdem müşârun-ileyh Hüseyin Ağa evkāf-ı mezbûre mütevellîsi iken mahmiye-i Kostantıniyye mahallâtından Gıyaseddin mahallesinde vâki‘ merhûm İmâm İbrahim Çelebi Medîne-i Münevvere fukarâsına vakfettiği meblağdan on iki bin akçe kabz etmişidi. Hâlâ meblağ-ı merkūmu bana teslîm etmek lâzım gelmeğin bana teslîm edip ben dahi sâlifü’z-zikr on iki bin akçeyi mütevellî-i sâbık mûmâ-ileyh Hüseyin Ağa yedinden tevliyeti zamânında merhûm ve mezbûr İbrahim Çelebi evkāfı mâlından Ebû Talib yedinden ahz u kabz ettiği on iki bin akçeden bir akçe ve bir habbe mezkûr Hüseyin Ağa yedinden bâkī kalmadı benim makbûzum oldu dedikde mütevellî-i mezbûrun ikrâr-ı meşrûhun el-mukarrun-leh el-merhûm Hüseyin Ağa vicâhen tasdîk edicek mâ-hüve’l-vâkı‘ bi’t-taleb ketb olundu. Fî-evâsıtı Muharremi’l-harâm li-sene selâse ve selâsîn ve elf. Şühûdü’l-hâl: Yahya b. Hüdaverdi, Ahmed b. Mustafa, Mehmed b. Hasan, Mustafa b. Mehmed el-cündî, Muslihiddin b. Hüseyin, Mehmed b. Rıdvan el-cündî, Bâli b. Abdullah, Haşim b. Mehmed, İsmail Çavuş b. Abdullah, Nezîr Bey el-cündî, Mahmud Efendi b. Ömer el-müderris, Halil Efendi el-müderris, Mehmed Çelebi b. Abdülgani.