Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 401 Hüküm no: 343 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine Evkafı’ndan Debbağzade mahallesinde bulunan vakıf evin kiracısı Ayşî Efendi b. el-Hac Himmet’in bu evin tamiri için ne kadar masraf gerektiğinin tespiti talebi Vaka‘a el-emrü hasbemâ hurrire ve cere’ş-şe’nü misle mâ-kurrire ketebehü’l-fakīrü’l-verâ Hüseyin b. Mehmed el-me’mûr bi-teftîşi’l-evkāf -ufiye anhümâ- Medîne-i Münevvere alâ-münevvirihâ efdalü’t-tahiyye evkāfından mahrûse-i İstanbul’da Debbâğzâde mahallesinde vâki‘ olup dâhiliyyesi iki bâb tahtânî odayı ve matbahı ve hamâmı ve câmekeni ve orta sofayı ve bahçeyi ve bi’r-i mâyı ve muhavvatayı ve üç bâb fevkānî odayı ve orta sofayı ve kenîfi ve taşra gidecek memşâyı müştemil olup ve hâriciyyesi üç bâb fevkānî odayı ve iki sofayı ve kenîfi ve anbârı ve muhavvatayı muhtevî olan vakıf menzili otuz bin akçe icâre-i mu‘accele ve yevmî dörder akçe icâre-i müeccele ile mutasarrıf olan umdetü’l-müderrisîni’l-kirâm zübdetü’l-müdakkıkîni’l-fihâm Mevlânâ Ayşî Efendi b. el-Hâc Himmet meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip bundan akdem vakf-ı mezbûrda mülküm olup mukaddemâ verdiğim otuz bin akçe icâre-i mu‘acceleye zam olunup ve kendi mâlım ile nefsim için ma‘rifet-i mütevellî ile menzil-i merkūmun dâhiliyye ve hâriciyyesini cümleten ta‘mîr ve meremmet eyledim kıbel-i şer‘-i şerîfden nâib ve mi‘mâr irsâl olunup menzil-i mesfûrun üzerine varılıp ne mikdâr akçe harc u sarf olunduğu keşf ve tahrîr olundukdan sonra menzil-i mezbûru ta‘mîr etmekle asl-ı vakfı harâb ve ziyâ‘dan hıfz eylediğim cihetden icâre-i müeccelesinden ehl-i hibre ta‘yînle üzerine bir mikdâr akçe ta‘mîr ve meremmet için hatt olunmak taleb ederim dedikde savb-ı şer‘-i şerîfden zahrü’l-müderrisîni’l-kirâm bi’l-fi‘il Âişe Sultan müderrisi olan Hamza Efendi b. Ali ve hâssa mi‘mârlardan Hasan Çelebi b. Hüseyin nâm kimesneler irsâl olunup hâlâ Medîne-i Münevvere mütevellîsi olan fahrü’l-akrân Hüseyin Bey b. Memi el-cündî muvâcehesinde zeyl-i sütûrda isimleri mastûr olup binâ ve sükūf ahvâline vukūfları olan kimesneler ile menzil-i mezkûrun üzerine varılıp nazar olundukda fi’l-hakīka menzil-i mezbûrun üzerine varılıp nazar olundukda fi’l-hakīka menzil-i mezbûrun hâriciyyesinde olan bir bâb odanın üç duvarını ve musandırasını ve ocağını ve çiftlerinı ve dolablarını ve yedi aded çârçûbe ve pencere camlarını tecdîd ve ta‘mîre tahmînen on bin akçe ve hâric ve dâhil beyninde vâki‘ bir bâ-küçük odayı müceddeden binâya tahmînen altı bin akçe ve içeriye gidilecek mezbûr memşâya üç bin beş yüz akçe ve bir bâb büyük atîk odanın imâretine iki bin akçe ve iki sofanın tahta ve tuğla döşemelerine ve trabuzanlarına ve cümle duvarlar ki tuğla ve kirecine ve üstâdiyye ve mismâriye ve sâir mühimmâtına sekiz bin akçe ve taş nerdübâna ve [113a] havlusunu kaldırımına ve kenîfi tecdîdine ve ahırın meremmetine altı bin akçe <> cem‘an otuz beş bin beş yüz akçe ve menzil-i mesfûrun dâhiliyyesinde cânib-i garbında vâki‘ odayı ta‘mîr ve meremmete ve bir tarafına bir sofa ve bir şehnişîn ve ocağın müceddeden binâsına ve tuğla ve mismâriye ve sâir mühimmâtına on beş bin akçe ve sofanın tahta ve tuğla döşemesine ve sıvamasına ve dahlîzine ve trabuzanlarına beş bin üç yüz akçe ve helâ cânibinde vâki‘ duvarı müceddeden binâya üç bin yedi yüz akçe ve hamâmın duvarlarını tecvîf ve ta‘mîre ve külhanını ve câmekeni müceddeden binâya altı bin sekiz yüz kırk akçe ve bahçenin seksen zirâ‘ kerpiç duvarını müceddeden binâya iki bin sekiz yetmiş akçe ve dizme ve sedlerine dokuz yüz akçe ve tahtalı büyük odanın camlarını ve musandırasını ve ocağını ve pencere kapaklarını ve sâir muhtâc olan mevâzi‘ihi ta‘mîre üç bin akçe ve bi’r-i mâyı tanzîfe ve etrâfını meremmete iki yüz yirmi akçe ve matbahı ta‘mîre iki bin kırk akçe cem‘an yetmiş dört bin beş yüz yetmiş akçe ancak kifâyet eder noksân ile binâ ve meremmet mümkün değildir ve icâre-i müeccele-i merkūmenin yevmî ikişer akçesi münhat olup beher yevm ikişer akçe ile olmak ecr-i mislidir ve min-külli’l-vücûh vakfa nef‘i mukarrer deyu mi‘mâr-ı merkūm ve sâir ehl-i vukūf ictimâ‘ ve ittifâk eylediklerin mevlânâ-yı müşârun-ileyh mahallinde mütevellî-i mezbûr mahzarında tahrîr ve ba‘dehû meclis-i şer‘de inhâ ettikden sonra müste’cir-i mûmâ-ileyh Ayşî Efendi’nin hâlâ ve binâ ve meremmet harc u sarf ettiği yetmiş dört bin beş yüz yetmiş akçe mukaddemâ verdiği otuz bin akçe icâre-i mu‘acceleye zam olunup cümle vakf-ı merkūmda yüz dört bin beş yüz yetmiş akçe icâre-i mu‘accelesi olduğu mukarrer olup icâre-i müeccele-i mezbûreden yevmî iki akçesini izn-i mütevellî ile hat olunmak üzere tenbîh kılınıp ba‘de’l-yevm menzil-i merkūmun yevmî icâre-i müeccelesini ikişer akçe olmak üzere mâ-hüve’l-vâkı‘ bi’t-taleb ketb olunup yed-i tâlibe def‘ olundu. Tahrîren fî-gurreti Muharremi’l-harâm li-sene isneyn ve selâsîn ve elf. Şühûdü’l-hâl: Fahrü’l-müderrisîn Seyfullah Çelebi b. ( ), Hasan b. Ahmed er-râcil, Ahmed b. Mehmed, Hüseyin b. Hasan er-râcil.